ក្រសួងអប់រំ យុវជន និងកីឡា នឹងប្តូរសម័យប្រឡងបាក់ឌុបពីថ្ងៃទី១៧-១៨ សីហា ទៅកាលបរិច្ឆេទថ្ងៃ ២៧-២៨ សីហាវិញ។ នេះបើតាមលិខិតរបស់ក្រសួងអប់រំ យុវជន និងកីឡា និងតាមការបញ្ជាក់ពីលោក រស់ សុវាចារ អ្នកនាំពាក្យក្រសួងងប់រំ ប្រាប់អ្នកសារព័ត៌មានតាមតេលេក្រាម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រសួងអប់រំបញ្ជាក់ថា ដោយសារ រាជរដ្ឋាភិបាលបានចេញអនុក្រឹត្យលេខ ១០១ ចុះថ្ងៃ ១៥ កក្កដា ២០២០ ស្តីពីការអនុញ្ញាតឲ្យមន្ត្រីរាជការ និយោជិត កម្មករឈប់សម្រាកការងារនៅថ្ងៃ ១៧ដល់២១ សីហា ២០២០ ចំថ្ងៃប្រឡង ក្រសួងថា សូមកែសម្រួលសម័យប្រលងសញ្ញាបត្រមធ្យមសិក្សាទុតិយភូមិ នៅតាមគ្រឹះស្ថានសិក្សាឯកជនសម្រាប់ឆ្នាំ ២០១៩-២០២០ ទៅថ្ងៃ ២៧ សីហា ២០២០ វិញ។
គួររំឭកថា កាលពីថ្ងៃទី១៤ កក្កដា ឆ្នាំ២០២០កន្លងទៅ ក្រសួងអប់រំ យុវជន និងកីឡា បានចេញសេចក្តីណែនាំលិខិតលេខ ៣៣ ស្តីពីការប្រឡងបាក់ឌុបនៅតាមគ្រឹះស្ថានសិក្សាឯកជនសម្រាប់ឆ្នាំសិក្សា២០១៩-២០២០។ ហើយកាលនោះដោយសារតែស្ថានភាពជំងឺកូវីដ-១៩ ក្រសួងអប់រំ យុវជន និងកីឡាបានអនុញ្ញាតឲ្យគ្រឹះស្ថានសិក្សាឯកជនរៀបចំការប្រឡងបាក់ឌុបតាមគ្រឹះស្ថានរៀងៗខ្លួន ក្រោមកិច្ចសហការជាមួយក្រសួងអប់រំ យុវជន និងកីឡា និងមន្ទីរអប់រំ យុវជន និងកីឡាតាមការចាំបាច់។
ជាការកត់សម្គាល់ តាមគម្រោងការប្រឡងបាក់ឌុបនៅគ្រឹះស្ថានសិក្សាឯកជនមានរយ:ពេល២ថ្ងៃ ដោយលោក រស់ សុវាចារ បន្ថែមថា ក្រសួងនឹងជម្រាបជូនបច្ចុប្បន្នភាពនៃកាលបរិច្ឆេទសម័យប្រឡង ដោយប្តូរពី១៧-១៨ សីហាទៅ ២៧-២៨ សីហាវិញ។
ក្រៅពីនេះ លោក រស់ សុវាចារ ថា «គ្រឹះស្ថានសិក្សាឯកជនត្រូវដាក់ពាក្យស្នើសុំរៀបចំការប្រឡងបាក់ឌុបមកក្រសួងអប់រំ យុវជន និងកីឡាតាមរយ:មន្ទីរអប់រំ យុវជន និងកីឡាឲ្យបានមុនដំណាច់ខែកក្កដា ឆ្នាំ២០២០ ដើម្បីពិនិត្យ និងទទួលស្គាល់។ គ្រឹះស្ថានសិក្សាឯកជននីមួយៗត្រូវរៀបចំមណ្ឌលប្រឡង និងបញ្ជូនមកក្រសួងអប់រំ តាមរយៈមន្ទីរអប់រំដើម្បីពិនិត្យ និងសម្រេច។ ក្នុង១បន្ទប់ប្រឡងមានបេក្ខជនពី១០ទៅ១៥នាក់។ គ្រឹះស្ថានសិក្សាឯកជន ធានាអនុវត្តវិធានការសុវត្ថិភាពសុខភាពរបស់ក្រសួងសុខាភិបាល និងអង្គការសុខភាពពិភពលោក។ ក្រសួងអប់រំ យុវជន និងកីឡា និងមន្ទីរអប់រំ យុវជន និងកីឡានឹងចុះពិនិត្យការប្រឡងតាមការចាំបាច់ ដើម្បីធានាគុណភាពនៃការប្រឡង»។
អ្នកនាំពាក្យរូបនេះបន្ថែមប្រាប់អ្នកសារព័ត៌មានថា៖ «ចំណែកឯការប្រឡងបាក់ឌុបរបស់គ្រឹះស្ថានសិក្សាសាធារណ: ក្រសួងអប់រំ យុវជន និងកីឡានឹងជម្រាបជូននាពេលក្រោយ។ ចំពោះមុខនេះ សូមសិស្សានុសិស្សទាំងអស់បន្តការសិក្សាពីចម្ងាយ ដោយអនុវត្តវិធានការសុវត្ថិភាពសុខភាព តាមការណែរបស់ក្រសួងសុខាភិបាល»៕