អាមេរិក​យល់ព្រម អភិវឌ្ឍសមត្ថភាព​យន្តហោះចម្បាំងឱ្យប្រទេសឈីលី ​ក្នុងតម្លៃ៦៣៤លានដុល្លារ

សង់ចាកូ៖ ទីភ្នាក់ងារ​ការពារសន្តិសុខជាតិ បាន​និយាយកាលពីថ្ងៃព្រហស្បតិ៍ថា​ សហរដ្ឋអាមេរិកបាន​ចុះកិច្ចព្រមព្រៀងលើកញ្ចប់ថវិកាចំនួន ៦៣៤លានដុល្លារ ​ក្នុងការ​ជួយអភិវឌ្ឍសមត្ថភាព​យន្តហោះចម្បាំងប្រភេទ F-16 Fighting Falcon របស់កងទ័ពអាកាសនៃសាធារណរដ្ឋឈីលី។

យោងតាមសេចក្តីថ្លែងការណ៍មួយ របស់ទីភ្នាក់ងារការពារ​សន្តិសុខជាតិឈីលីបានឱ្យដឹងថា នៅក្នុងទំហំទឹកប្រាក់ពាន់លានដុល្លារនេះ សហរដ្ឋអាមេរិកនឹងត្រូវជួយអភិវឌ្ឍសមត្ថភាព​ ប្រព័ន្ធភ្ជាប់ខ្សែមួកសុវត្ថិភាពរួមចំនួន១៩ ប្រព័ន្ធ​ផ្ទុកគ្រាប់ MK-82 (500LB) ចំនួន៦ ប្រព័ន្ធ LN-260 បង្កប់ GPS/INS ចំនួន៤៤ ក៏ដូចជាប្រព័ន្ធទំនាក់ទំនងមួយចំនួនទៀត។

សូមជម្រាបផងដែរថា គោលបំណងក្នុងការស្នើសុំឱ្យអាមេរិកជួយ អភិវឌ្ឍសមត្ថភាព​យន្តចម្បាំងកងទ័ពអាកាសឈីលីនេះ គឺដើម្បីឆ្លើយតបនឹងការគំរាមកំហែងនាពេលបច្ចុប្បន្ននិងអនាគត ក៏ដូចជាអនុញ្ញាតឱ្យសាធារណរដ្ឋឈីលី អាចរក្សាបាននូវអធិបតេយ្យភាពការពារមាតុភូមិ។ ម៉្យាងវិញទៀត វាក៏អាចជួយឱ្យប្រទេសឈីលី អាច​បង្កើន​កិច្ចសហប្រតិបត្តិការជាមួយសហរដ្ឋអាមេរិក និងប្រទេសជាដៃគូ​ផ្សេងទៀតដែរ៕