តារាឆ្នើមរបស់ Liverpool រូបនេះ ត្រូវបានចោរគាស់ផ្ទះ លួចទ្រព្យសម្បត្តិមានតម្លៃជាច្រើន កំឡុងពេលជាប់នៅលើកពាន PL ជាមួយក្រុម

អង់គ្លេស៖ ផ្ទះរបស់ខ្សែបម្រើ Fabinho ត្រូវបានចោរចូលលួច កំឡុងពេលជម្រើសជាតិប្រេស៊ីលរូបនេះ ជាប់នៅលើកពាន Premier League ជាមួយមិត្តរួមក្រុមកាលពីយប់ ថ្ងៃពុធកន្លងទៅ។

ក្រុមហង្សក្រហម បានធ្វើការប្រារព្វពិធីលើកពាន Premier League របស់ខ្លួន បន្ទាប់ពីផ្ដួលក្រុមតោខៀវ Chelsea យ៉ាងចាស់ដៃ ក្នុងលទ្ធផល៥ទល់នឹង៣ នៅកីឡដ្ឋាន Anfield ។

ដោយឡែកទន្ទឹមនឹងការសប្បាយ ក៏មានរឿងអកុសលបន្តិចផងដែរ សម្រាប់កីឡាករ Fabinho ដោយរបាយការណ៍របស់កាសែត Liverpool Echo បានបញ្ជាក់ថា ផ្ទះរបស់ម្ចាស់អាវលេខ៣រូបនេះ ត្រូវបានចោរលួចចូលចន្លោះពីម៉ោង៣រសៀល ថ្ងៃពុធ និងម៉ោង៤ភ្លឺ ព្រឹកថ្ងៃព្រហស្បតិ៍សប្ដាហ៍នេះ។

តាមរយៈសេចក្ដីរាយការណ៍របស់មន្រ្តីប៉ូលីស បានឲ្យដឹងថា របស់របរគ្រឿងអលង្កាមួយចំនួនត្រូវបានចោរលួចយកទៅ ព្រមទាំងឡានម៉ាក Audi RS6 ពណ៌ប្រផេះ១គ្រឿងផងដែរ។

ប៉ុន្តែមិនថ្វី ឡានរបស់ Fabinho ត្រូវបានគេរកឃើញវិញ នៅទីក្រុង Wigan ដោយបច្ចុប្បន្ន ត្រូវបានប្រគល់ជូនម្ចាស់ដើមដែលជាខ្សែបម្រើកណ្ដាលក្រុម Liverpool រូបនេះ រួចរាល់ហើយ៕

ប្រភព៖ dailystar