អាមេរិកចោទប្រកាន់រុស្ស៊ី ថាបាន​ធ្វើតេស្តអាវុធប្រឆាំងផ្កាយរណប នៅទីអវកាស

វ៉ាស៊ីនតោន៖ កាលពីថ្ងៃព្រហស្បតិ៍ម្សិលមិញនេះ សហរដ្ឋអាមេរិកនិងអង់គ្លេស បានធ្វើការចោទប្រកាន់ទៅលើប្រទេសរុស្ស៊ី​​ ​ចំពោះសកម្មភាពធ្វើតេស្តអាវុធប្រឆាំងប្រព័ន្ធផ្កាយរណបមួយ​នៅ​ទីអវកាស ក៏ដូចជាការដាក់ពង្រាយប្រព័ន្ធអាវុធ ដែល​អាចបង្កការគំរាមកំហែងដល់ផ្កាយរណបរបស់សហរដ្ឋអាមេរិក ​​និងប្រទេសដទៃទៀត។

ដោយឡែកក្រសួងការពារជាតិរុស្ស៊ីបានឱ្យដឹងថា ព្រឹត្តិការណ៍កាលពីថ្ងៃទី ១៥ ខែកក្កដា ​គឺពាក់ព័ន្ធទៅនឹងយានអវកាសតូចមួយ ដែល​មាននាទីគ្រាន់តែអង្កេតផ្កាយរណបជាតិមួយពីចម្ងាយដោយប្រើឧបករណ៍ពិសេស ហើយបន្ទាប់មក វាក៏បញ្ជូនព័ត៌មានដែលបាន​ត្រួតពិនិត្យទាំងនោះ ត្រឡប់មកមូលដ្ឋាននៅលើផែនដីវិញ​តែប៉ុណ្ណោះ។ ប៉ុន្តែបើទោះយ៉ាងណាក្តី សហរដ្ឋអាមេរិកបាននិយាយថា សកម្មភាពរបស់រុស្ស៊ី គឺមិន​សមស្របទៅនឹងបេសកកម្ម ដូចដែល​ខ្លួនបាន​អះអាងខាងលើនោះ​ឡើយ។

​យោងតាមឯកសារយុទ្ធសាស្ត្រអវកាសរបស់​មន្ទីរប៉ង់តាហ្គោន​​ ដែល​ចេញផ្សាយកាលពីខែមុនបានអះអាងថា ប្រទេសចិននិងរុស្ស៊ី​បាននឹងកំពុងបង្កការគំរាមកំហែងជាយុទ្ធសាស្ត្រធំបំផុត ​តាមរយៈការអភិវឌ្ឍ ការធ្វើតេស្ត និងការដាក់ពង្រាយអាវុធប្រឆាំងប្រព័ន្ធផ្កាយរណបជាបន្តបន្ទាប់ ក្នុងគោលបំណងពង្រីកឥទ្ធិពល​នៅទីអវកាស ហើយប្រទេសទាំងពីរ ក៏កំពុងប្រែទីអវកាសទៅជាទីកន្លែងប្រឈមមុខដាក់គ្នា រវាងប្រទេសមហាអំណាចដែរ៕