មកមើល Aguero ធ្វើអ្វីខ្លះដើម្បីឲ្យរូបគេជាទាន់ការប្រកួត Champions League ខាងមុខ

បរទេស៖ ខ្សែប្រយុទ្ធជួរមុខ Sergio Aguero របស់ក្លិប Manchester City កំពុងតែព្យាយាមហ្វឹកហាត់យ៉ាងខ្លាំងដើម្បីឲ្យជាទាន់ការប្រកួត UEFA Champions League ខាងមុខ។

Aguero បានរងរបួសជង្គង់យ៉ាងធ្ងន់ធ្ងរពេលប៉ះជាមួយក្លិប Burnley កាលពីខែមុន ដោយត្រូវបានបញ្ជូនទៅធ្វើការវះកាត់នៅទីក្រុង Barcelona ប្រទេសអេស៉្បាញ។ ចាប់តាំងពីពេលនោះមករូបគេបានបាត់បង់ការប្រកួតចំនួន៩លើក មកហើយជាមួយ Man City ហើយនៅពេលនេះកីឡាករវ័យ៣២ឆ្នាំរូបនេះបានធូរស្បើយច្រើនហើយ។ 

ជាក់ស្តែង Aguero កំពុងតែព្យាយាមយ៉ាងខ្លាំងដោយធ្វើការហ្វឹកហាត់៣ដងឯណោះក្នុងមួយថ្ងៃ ក្នុងនោះរូបគេកំពុង ព្យាយាមក្នុងការធាក់កង់ និងសង្ឃឹមថាអាចរត់បាននៅប៉ុន្មានថ្ងៃទៀតនេះ។ គួរឲ្យដឹងដែរថា Man City កំពុងតែដាក់គោលដៅធំដើម្បីធ្វើយ៉ាងណាឲ្យឈ្នះពាន Champions League រដូវកាលនេះឲ្យបាន ដោយនឹងត្រូវប៉ះជាមួយ Real Madrid ជើងទី២នៅដើមខែក្រោយនេះ បន្ទាប់ពីបានយកឈ្នះក្លិបមួយនេះដោយលទ្ធផល១ទល់នឹង២កាលពីជើងទី១នោះ៕

ប្រភព៖ dailymail