គម្រោងដ៏អស្ចារ្យមួយនឹងបង្កើត មន្ទីរពិសោធន៍នៅក្រោមសមុទ្រដំបូងគេ នៅលើពិភពលោក

បរទេស៖ ដោយស្ថិតនៅជម្រៅ១៨.២៨ម៉ែត្រពីក្រោមផ្ទៃសមុទ្រ Caribbean Sea លោក Fabien Cousteau ដែលជាជលាជន និងអ្នករចនាឧស្សាហកម្ម លោក Yves Béhar កំពុងប្រមើមើលស្ថានីយស្រាវជ្រាវក្រោមទឹក និងជាកន្លែងស្នាក់នៅដ៏ធំបំផុត។

អ្នកទាំងពីរបានបង្ហាញមន្ទីរពិសោធន៍ដ៏ទំនើប ដែលមានទំហំ៣៧១ម៉ែត្រការ៉េ ដែលស្ថិតនៅក្រោមទឹក ក្បែរឆ្នេរសមុទ្រ Curaçao ដែលផ្ដល់ជាផ្ទះសម្រាប់ក្រុមអ្នកវិទ្យាសាស្ត្រនិងអ្នកស្រាវជ្រាវ មកពីជុំវិញពិភពលោក ដើម្បីសិក្សាពីមហាសមុទ្រ ពីផលប៉ះពាល់នៃការប្រែប្រួលអាកាសធាតុ និងចំពោះរបកគំហើញឱសថផងដែរ។ ត្រូវបានរចនាឡើងជារាងរង្វង់ដែលមានពីរជាន់ និងស្ថិតក្រោមសមុទ្រ គម្រោង Proteus ត្រូវបានបង្កើតដោយមានមន្ទីរពិសោធន៍ជាច្រើន ទីស្នាក់ការផ្ទាល់ខ្លួន បន្ទប់វេជ្ជសាស្ត្រ និងកន្លែងសម្រាប់ចេញទៅហែលទឹកនៅក្រោមសមុទ្រផងដែរ។

ដំណើរការដោយប្រើថាមពលខ្យល់ ថាមពលពន្លឺព្រះអាទិត្យ និងការបំលែងថាមពលកម្ដៅសមុទ្រ រចនាសម្ព័ន្ធទាំងនេះក៏នឹងមានផ្ទះកញ្ចក់ក្រោមទឹកដំបូងគេ សម្រាប់ដាំដំណាំ ក៏ដូចជាកន្លែងផលិតវីដេអូផងដែរ។

​គម្រោង Proteus នេះមានបំណងធ្វើជាកន្លែងពិសោធន៍នៅក្រោមទឹក ឲ្យដូចជាស្ថានីយអវកាសអន្តរជាតិ ដែលជាកន្លែងមានភ្នាក់ងាររដ្ឋាភិបាល ក្រុមអ្នកវិទ្យាសាស្ត្រ និងវិស័យឯកជនអាចសហការគ្នាក្នុងស្មារតីចំណេះដឹងរួម ដោយមិនគិតពីព្រំដែននោះឡើយ។

លោក Cousteau បាននិយាយថា ការរុករកមហាសមុទ្រគឺសំខាន់ជាងការរុករកនៅទីអវកាស១០០០ដង សម្រាប់ការរស់រានរបស់យើង។ គេរំពឹងថា គម្រោងនេះនឹងត្រូវរចនានិងតម្លើង ដោយប្រើរយៈពេលយ៉ាងហោចណាស់ក៏៣ឆ្នាំដែរ៕