ក្រោយប៉ះ Liverpool យប់មិញ Lampard ថាកីឡាកររូបនេះមានកម្រិតលេងមិនក្រោម Hazard នោះទេ

អង់គ្លេស៖ លោកគ្រូបង្វឹក Frank Lampard បានធ្វើការប្រៀបធៀបកីឡាករ Christian Pulisic ទៅនឹងអតីតតារាឆ្នើមរបស់ក្លិប កីឡាករ Eden Hazard ដែលទើបផ្លាស់ទៅ Real Madrid នោះថា រូបគេទាំងពីរមានកម្រិតនៃការលេងមិនក្រោមគ្នាប៉ុន្មាននោះទេនៅទឹកដី Stamford Bridge នេះ។

គួរឲ្យដឹងដែរថា Pulisic រកបានមួយគ្រាប់និងបោះបាល់ឲ្យ Abraham បានមួយគ្រាប់ផងដែរ ពេលប៉ះជាមួយនឹង Liverpool កាលពីយប់មិញ ក្រោយធ្វើការដូរចូលនៅនាទីទី៦០ ជំនួសកីឡាករ Mason Mount ។ សរុបមកនៅក្នុងរដូវកាលដំបូងជាមួយ Chelsea កីឡាករវ័យ២១ឆ្នាំសញ្ជាតិអាមេរិករូបនេះរកបាន៩គ្រាប់និងបោះបាល់ឲ្យដៃគូរបាន៤ដងនៅក្នុងការបង្ហាញខ្លួន២៤ប្រកួតជាមួយក្លិប។ ងាកមកមើល Hazard វិញនៅក្នុងរដូវកាលដំបូងជាមួយ Chelsea រូបគេរកបាន៩គ្រាប់និងបោះបាល់ឲ្យដៃគូបាន១១ដងក្នុងការបង្ហាញខ្លួនសរុប៣៤ប្រកួតនៅក្នុងរដូវកាល២០១២-២០១៣៕ 

ប្រភព៖ goal