Arnold ស៊ុតបាល់ free-kick កោងចូលដាច់ចង្កះអ្នកចាំទី Kepa ស្អាតណាស់យប់មិញ (មានវីដេអូ)

អង់គ្លេស៖ បើទោះបីជាមិនបានចូលលេងឲ្យ Liverpool ប៉ះ Chelsea យប់មិញដោយសារតែមានរបួស ក៏កីឡាករ Jorden Henderson នៅតែត្រូវបានក្លិបផ្តល់កិត្តិយសមកដឹកនាំលើកពាន Premier League លើកដំបូងក្នុងរយៈពេល៣០ឆ្នាំរបស់ក្លិប។

ក្រោយពីចាញ់ Liverpool យប់មិញក្លិបរបស់លោក Frank Lampard ត្រូវការតែមួយពិន្ទុទៀតប៉ុណ្ណោះនៅក្នុងប្រកួតចុងក្រោយជាមួយ Wolves ដើម្បីធានាបានកៅអីទៅលេង Champions League រដូវកាលក្រោយ។

នៅក្នុងការប្រកួតយប់មិញនេះក្លិបម្ចាស់ផ្ទះ Liverpool ធ្វើការនាំមុខមុនរហូតដល់ទៅ៣គ្រាប់ឯណោះ ដោយគ្រាប់បើកឆាករកបានដោយការស៊ុតពីលើដំបូលទូករបស់កីឡាករ Naby Keita មុនពេលដែល Trent Alexander-Arnold ស៊ុតបាល់ free-kick កោងចូលយ៉ាងស្អាត និងមួយគ្រាប់ទៀតរកបានដោយការស៊ុតរបស់កីឡាករ Gini Wijnaldum ។ យ៉ាងណាមិញ Chelsea ក៏មានឱកាសតាមបានមួយគ្រាប់វិញផងដែរនៅចុងតង់ទី១ រកបានតាមរយៈកីឡាករ Olivier Giroud ។

ចូលដល់តង់ទី២ Firmino ថែមបានមួយគ្រាប់ទៀតឲ្យ Liverpool មុនពេលដែល Chelsea តាមបាន២គ្រាប់វិញដោយកីឡាករ Tammy Abraham និងកីឡាករដូរចូលនៅតង់ទី២ Christian Pulisic ។ ក្រុមរបស់លោក Klopp មិនទាន់ឈប់ត្រឹមនេះនោះទេ ពោលគឺនៅចុងតង់ទៅហើយកីឡាករ Alex Oxlade-Chamberlain ស៊ុតបានគ្រាប់ទី៥ឲ្យ Liverpool យកឈ្នះ Chelsea ក្នុងលទ្ធផល៥ទល់នឹង៣៕

ប្រភព៖ bbc