១គ្រាប់នេះលឿនណាស់អ្នកចាំទីបានត្រឹមឈរមើល! Aston ឡើងផុតតំបន់គេកាត់ចោល ក្រោយយកឈ្នះ Arsenal យប់មិញ (មានវីដេអូ)

អង់គ្លេស៖ ក្រុម Aston Villa ក្នុងនាមជាម្ចាស់ផ្ទះ បានបើកទ្វារកីឡដ្ឋាន Villa Park ទទួលស្វាគមន៍ក្រុមភ្ញៀវកាំភ្លើងធំ Arsenal ក្នុងការប្រកួតក្របខណ្ឌ​ Premier League សប្ដាហ៍ទី៣៧ កាលពីរាត្រីថ្ងៃអង្គារម្សិលមិញនេះ។

ក្នុងការប្រកួតដ៏ជក់ចិត្តនេះ ក្រុម​ Aston ពិតជាធ្វើបានល្អ ជាក់ស្ដែងកាលពីយប់មិញ ពួកគេបង្កើតឱកាសស៊ុតសំដៅទីក្រុម Arsenal បានរហូតដល់៨ជើង ចំគោលដៅ៣ដង សម្រេចទីបាន១គ្រាប់ ចំណែកឯក្រុម Arsenal វិញ ស៊ុតបាន៤ជើងប៉ុណ្ណោះ មិនចំគោលដៅសូម្បីតែម្ដង។

១គ្រាប់យក៣ពិន្ទុ ដ៏មានសារៈសំខាន់សម្រាប់ក្រុម Aston រកបានដោយកីឡាករ Trezeguet នៅនាទីទី២៧ ក្រោយទទួលបានបាល់ពីកាតែតរបស់មិត្តរួមក្រុម Tyrone Mings។

តាមរយៈជ័យជម្នះនេះ បានជួយ Aston Villa រំកិលខ្លួនបន្តិចឡើងផុតពីតំបន់ដែលត្រូវគេកាត់ចោល ឈរលេខរៀងទី១៧ មាន៣៤ពិន្ទុ ចាញ់ក្រុមលេខ១៦ West Ham ចំនួន១ពិន្ទុ ចំណែកឯ Arsenal វិញ បានធ្លាក់ដល់ចំណាត់ថ្នាក់លេខ១០ឯណោះ ក្រោយ៣៧ប្រកួតកន្លងទៅរកបាន៥៣ពិន្ទុ ។

គួរឲ្យដឹងដែរថា ក្រុមទាំងពីរ នៅត្រូវធ្វើការប្រកួតម្នាក់១លើកទៀត ទើបបញ្ចប់រដូវកាល ក្នុងនោះប្រកួតបន្ទាប់ Arsenal ត្រូវប៉ះជាមួយក្រុម Watford នៅថ្ងៃអាទិត្យចុងសប្ដាហ៍នេះ វេលាម៉ោង១០យប់ ខណៈក្រុម Aston Villa ត្រូវប៉ះក្រុមញញួរយក្ស West Ham ក្រៅដី នៅថ្ងៃអាទិត្យវេលាម៉ោង១០យប់ដូចគ្នា៕

សូមទស្សនាវីដេអូសង្ខេបនៃការប្រកួតខាងក្រោមនេះ៖