គួរឱ្យសរសើរមែន! ក្មេងប្រុសអាយុ៦ឆ្នាំម្នាក់ បានជួយ សង្គ្រោះជីវិតប្អូនស្រីពីឆ្កែកំណាច

បរទេស៖ Bridger Walker ជាក្មេងប្រុសអាយុ ៦ ឆ្នាំក្លាហានម្នាក់ បានទទួលការចាប់អារម្មណ៍ពីបណ្តាញសង្គមបន្ទាប់ពីទទួលបានការកោតសរសើរពី Anne Hathaway ចំពោះការជួយសង្គ្រោះប្អូនស្រីរបស់គាត់ពីការវាយប្រហារពីសត្វឆ្កែ។

សេចក្ដីថ្លែងការណ៍មួយពីក្រុមគ្រួសារដែលទទួលបានដោយសារព័ត៌មាន CNN បានឱ្យដឹងថាកាលពីថ្ងៃទី ៩ ខែកក្កដា ក្មេងប្រុសមានឈ្មោះថា Bridger បានលោតចូលធ្វើសកម្មភាពដើម្បីជួយសង្គ្រោះប្អូនស្រីអាយុ ៤ ឆ្នាំរបស់គាត់។ ពេលកំពុងការពារប្អូនស្រីរបស់គាត់ គាត់ត្រូវបានឆ្កែវាយប្រហារយ៉ាងសាហាវ ដែលធ្វើឱ្យគាត់មានរបួសខ្លាំងជាងគេនៅលើថ្ពាល់ផ្នែកខាងឆ្វេង។

ក្រោយមកទៀត ក្មេងប្រុស Bridger បានធ្វើការវះកាត់រយៈពេល ២ ម៉ោង ហើយរបួសនៅលើថ្ពាល់របស់គាត់ជាង ៩០ ថ្នេរ។ ហើយនៅពេលដែលឪពុករបស់គាត់សួរគាត់ថា ហេតុអ្វីបានជាគាត់លោតចូលជួយប្អូនស្រីគាត់ ខណ:ពេលដែលឆ្កែកំពុងនឹងខាំប្អូនរបស់គាត់។ គាត់បានឆ្លើយតបទៅវិញថា "ប្រសិនបើមាននរណាម្នាក់ត្រូវស្លាប់ ខ្ញុំគិតថាវាគួរតែជាខ្ញុំ"។

នេះបើយោងតាមសេចក្តីថ្លែងការណ៍ ទាំងនោះគឺជាពាក្យដែលធ្វើឱ្យមនុស្សជាច្រើនបានកោតសរសើនៅសេចក្តីក្លាហានរបស់គាត់។ ម្តាយមីងរបស់ក្មេងប្រុសម្នាក់នេះបានចាប់ផ្តើមបង្ហោះតាមបណ្តាញសង្គម Instagram ហើយបានចែករំលែកថា Bridger គឺជាអ្នកគាំទ្ររបស់ Avengers។ ក្រោយមក Bridger មានវីឌីអូខល សួរសុខទុក្ខ ពីតារាសម្តែងល្បីៗជាច្រើនរូបក្នុងរឿង Avengers ផងដែរ៕

ប្រភព: CNN