ទឹក​​ធ្លាក់​​ច្រក​​ល្អៀង​​នៃ​ទឹកដី​ពោធិ៍​សាត់ កំពុង​​អន្ទង​​អារម្មណ៍អ្នក​ចូល​ចិត្ត​​​លំហែ​​​កាយ​​​នាអំឡុង​ថ្ងៃ​ឈប់​សម្រាកខាងមុខ​

រមណីយដ្ឋានទឹកធ្លាក់ច្រកល្អៀងក្នុងខេត្តពោធិ៍សាត់ ជាទីកម្សាន្តដ៏សែនមនោរម្យ សម្រាប់ភ្ញៀវទេសចរជាតិ និង​អន្តរជាតិ​មកលម្ហែអារម្មណ៍នៅថ្ងៃចុងសប្តាហ៍ ឬថ្ងៃឈប់សម្រាក។

រមណីយដ្ឋានទឹកធ្លាក់ច្រកល្អៀង មានទឹកធ្លាក់ចំនួន ៩ដំណាក់ គឺ មានដំណាក់កោះភ្ញៀវ ដំណាក់កោះយាយចាំតា ដំណាក់ទឹកឈូ ដំណាក់មនោរម្យ ដំណាក់ថ្មសណ្តូក ដំណាក់ព្រះ ដំណាក់ជ្រៃក្រឹម ដំណាក់កោះសុបិន និង ដំណាក់​ទឹកធ្លាក់ ហើយដំណាក់ទី១ ដល់ដំណាក់ទី៩  លាតសន្ធឹងក្នុងចម្ងាយជិត១គីឡូម៉ែត។

សម្រស់ធម្មជាតិដ៏ស្រស់បំព្រងនេះបានធ្វើឲ្យកំណើនភ្ញៀវទេសចរជាតិ និងអន្តរជាតិទៅលេងកម្សាន្តមិនចេះដាច់ ដោយនៅថ្ងៃចុងសប្តាហ៍ មានភ្ញៀវទេសចរចន្លោះពី ៥០០នាក់ ទៅ១៧០០នាក់ បន្ទាប់ពីស្ថានភាពនៃជំងឺកូវីដ-១៩ មានការធូរស្បើយបន្តិច និងមានការផ្សព្វផ្សាយរបស់មន្ទីរទេសចរណ៍ខេត្តពោធិ៍សាត់ ទាក់ទងទៅនឹងតំបន់​រមណីយ​ដ្ឋានមួយនេះផងដែរ។
សូមបញ្ជាក់ថា ទឹកធ្លាក់ច្រកល្អៀង ស្ថិតនៅចន្លោះភ្នំយ៉ោក ដែលមានទីតាំងនៅក្នុងភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់ ដែលមានចម្ងាយប្រមាណជាង ១៤០គីឡូម៉ែត្រប៉ុណ្ណោះពីរាជធានីភ្នំពេញ។

សូមទស្សនារូបភាពខាងក្រោម៖