Inter Milan ត្រៀមវៃចេញកីឡាកររូបនេះ ទោះបីទើបទិញបាន ៦ ខែក៏ដោយ

កីឡាករ Christian Eriksen អតីតខ្សែបម្រើក្រុម Tottenham Hotspur ដែលទើបផ្លាស់ទៅលេងឲ្យ​ Inter Milan កាលពីដើមឆ្នាំ ២០២០ នេះគឺ Inter Milan ត្រៀមវៃចេញហើយ បើទោះបីជាលេងទើបបាន ៦ ខែ​ក៏ដោយ។

ក្លឹបបាល់ទាត់ដែលមានមូលដ្ឋាននៅប្រទេសអ៊ីតាលីមួយនេះកំពុងតែរង់ចាំមើលថា តើមានក្លឹបណាដែលមានចំណាប់ចង់បានកីឡាករមួយនេះដែរឬទេ ក្រោយពីកីឡាកររូបនេះបរាជ័យក្នុងការលេងក្រោមការដឹកនាំរបស់គ្រូបង្វឹក Antonio Conte។

កីឡាករវ័យ ២៨ ឆ្នាំរូបនេះគឺបង្ហាញទម្រង់លេងពុំបានល្អនោះឡើយចាប់តាំងពីផ្លាស់មកលេងឲ្យ Inter Milan កាលពីខែ មករា ឆ្នាំ ២០២០ ដោយកាលពីប្រកួតថ្មីៗនេះដែល Inter Milan យកឈ្នះលើ Torino ដោយលទ្ធផល ៣ ទល់នឹង ១​ នោះ Eriksen ក៏ត្រូវបានលោក Antonio Conte ប្តូរចេញផងដែរ។

គួរបញ្ជាក់ដែរថា យោងតាមសារព័ត៌មាន ESPN បានឲ្យដឹងថា Inter Milan គ្រោងនឹងលក់ Christian Eriksen ចេញក្នុងតម្លៃ ៥៥ លានផោន៕