បរទេស៖ ក្លិប Newcastle United ត្រូវបានគេរាយការណ៍មកថាកំពុងតែចង់បានជើងស៊ុតរបស់ក្លិប Lazio គឺកីឡាករ Ciro Immobile មករួមក្រុមនៅរដូវក្ដៅនេះ ប៉ុន្តែការដោះដូរនេះអាចប្រព្រឹត្តទៅបាននោះ លុះត្រាតែលោកមហាសេដ្ឋី ឬព្រះអង្គម្ចាស់ Mohammad Bin Salman របស់ប្រទេសអារ៉ាប់ប៊ីសាអូឌីតទិញបានក្លិបមួយនេះជាផ្លូវការសិន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងរដូវកាលនេះ កីឡាករសញ្ជាតិអ៊ីតាលីវ័យ៣០ឆ្នាំ Immobile រកបាន២៩គ្រាប់ និងបញ្ជូនបាល់ឲ្យដៃគូបាន៨លើកនៅលីគកំពូល Serie A ដោយបានជួយឲ្យ Lazio ឡើងឈរលេខ៣នៅក្នុងតារាងលីគកំពូលរបស់អ៊ីតាលីមួយនេះ។ បើទោះបីជារៀងធ្លាក់គ្រាប់បាល់បន្តិចក្រោយពីបើកឲ្យមានការប្រកួតឡើងវិញនោះ ប៉ុន្តែរូបគេនៅតែឈរជាអ្នករកគ្រាប់បាល់ដ៏មុតស្រួចម្នាក់នៅទ្វីពអឺរ៉ុបរដូវកាលនេះដដែល។
ដោយឡែក ក្លិប Newcastle កំពុងតែរង់ចាំម្ចាស់ថ្មីមកគ្រប់គ្រងក្លិប ហើយប្រសិនបើការដោះដូរម្ចាស់ថ្មីសម្រេចរួចរាល់ហើយអស់ ក្លិបមួយនេះអាចនឹងជះលុយទិញយកកីឡាករល្អៗមករួមក្រុមមិនខាន។ យ៉ាងណាមិញ លីគកំពូល Premier League ក៏មិនទាន់អនុញ្ញាត្តិឲ្យមានការផ្លាស់ប្តូរម្ចាស់ជាផ្លូវការនៅឡើយនោះទេ ក្នុងចំនួនទឹកប្រាក់៣០០លានផោន (ឬប្រមាណ៣៧៨លានដុល្លារ) ដោយកំពុងតែមានភាពចម្រូងចម្រាស់អស់រយៈពេលជិត ៣ខែមកហើយ៕
ប្រភព៖ express