បរទេស៖ ប្រទេសចំនួន៣ ដែលរួមមាន សហរដ្ឋអាមេរិក ចិន និងអេមីរ៉ាតអារ៉ាប់រួម បាននឹងកំពុងត្រៀមធ្វើបេសកកម្ម បាញ់បង្ហោះយានទៅសិក្សាភពក្រហម (ភពព្រះអង្គារ) ក្នុងរយៈពេលប៉ុន្មានសប្តាហ៍ខាងមុខនេះ។ យានអវកាសនីមួយៗ នឹងត្រូវធ្វើដំណើរចម្ងាយជិត ៥០០លានគីឡូម៉ែត្រ ដើម្បីទៅដល់ភពព្រះអង្គារ ហើយទំនងនឹងទៅដល់ក្នុងខែកុម្ភៈឆ្នាំក្រោយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការកំណត់យកពេលវេលាបញ្ជូនយានឡើងទៅភពព្រះអង្គារក្នុងខែកក្កដានេះ គឺមិនមែនជារឿងចៃដន្យនោះទេ ព្រោះនៅពេលខាងមុខនេះ ភពផែនដីនិងភពអង្គារ នឹងធ្វើដំណើរស្ថិតមកដល់ចំណុចជិតគ្នាបំផុត ដែលវាជាឱកាសសំរាប់យានអវកាស អាចធ្វើដំណើរទៅដល់ភពព្រះអង្គារបានលឿន និងសន្សំសំចៃឥន្ធនៈ។ ហើយចំពោះទីតាំងរវាងភពផែនដីនិងព្រះភពអង្គារ ដែលស្ថិតនៅចំណុចជិតគ្នាបំផុតបែបនេះ គឺកើតឡើងរាល់ ២៦ ខែម្តងប៉ុណ្ណោះ។
យន្តអវកាស Perseverance របស់អង្គការអាមេរិកណាសា រួមជាមួយយាន Tianwen-1 របស់ចិន នឹងត្រូវទៅចុះចតលើផ្ទៃភពព្រះអង្គារ ដើម្បីស្វែងរកសញ្ញានៃជីវិត ប្រមូលសំណាកផ្សេងៗ ស្រាវជ្រាវរប្រភពទឹកនិងទឹកកក ដ៏ដូចជាសិក្សាពីបរិយាកាសនិងដីនៅទីនោះ។ ដោយឡែក យាន Amal (មានន័យថាក្តីសង្ឃឹម) របស់អារ៉ាប់រួម នឹងត្រូវគោចរជុំវិញភពក្រហម ដើម្បីធ្វើការសិក្សាពីអាកាសធាតុ និងបរិយាកាសរបស់វា។
សូមបញ្ជាក់ផងដែរថា អេមីរ៉ាតអារ៉ាប់រួមបានកំណត់យកថ្ងៃទី ១៥ ខែកក្កដា ដើម្បីបាញ់បង្ហោះយានរបស់ខ្លួន តាមរយៈរ៉ុក្កែតរបស់ជប៉ុន នៅទឹកដីប្រទេសជប៉ុន ខណៈដែលប្រទេសចិនគ្រោងចាប់ផ្តើមបាញ់បង្ហោះយានរបស់ខ្លួន នៅថ្ងៃទី ២៣ ខែកក្កដា។ ហើយចុងក្រោយ សហរដ្ឋអាមេរិក នឹងចាប់ផ្តើមបេសសកម្មបាញ់បង្ហោះនេះ នៅថ្ងៃទី ៣០ ខែកក្កដា ចេញពីទឹកដីរដ្ឋផ្លូរីដា ភាគអាគ្នេយ៍សហរដ្ឋអាមេរិក៕