លេងឈុតធំហើយ! Man City បាញ់រ៉ាដាទៅកីឡាករថ្លៃៗទាំង៤ នេះក្រោយពីរឿងក្ដីជាមួយ UEFA ត្រូវបានបញ្ចប់នោះ

បរទេស៖ ក្លិប Manchester City កំពុងតែត្រៀមលុយធំដើម្បីទិញកីឡាករថ្លៃៗមកពង្រឹងក្រុមបន្ថែមនៅរដូវក្ដៅនេះក្រោយពីតវ៉ាក្ដីឈ្នះ UEFA ជុំវិញរឿងពិន័យ មិនឲ្យលេងនៅពានរង្វាន់ Champions League ចំនួនពីរឆ្នាំ។

លោក Pep Guardiola កំពុងតែដាក់គោលដៅធំដើម្បីទិញកីឡាករតម្លៃខ្លួនកប់ពពកចំនួន៤នាក់ ដើម្បីមកជួយក្លិបប្រជែងយកជើងឯក Premier League នៅរដូវកាលក្រោយ ពីក្លិប Liverpool ។ កីឡាករទាំង៤នាក់នោះមានដូចជា៖

• ខ្សែការពារវ័យ២៨ឆ្នាំ David Alaba របស់ Bayern Munich ដែលមានតម្លៃខ្លួនមិនក្រោមពី៦០លានផោន (ឬ៧៥លានដុល្លារ) នោះទេ។

• ខ្សែប្រយុទ្ធស្លាបវ័យ២០ឆ្នាំ Ferran Torres របស់ក្លិប Valencia ។ កីឡាករវ័យក្មេងសញ្ជាតិអេស៉្បាញរូបនេះអាចមានតម្លៃខ្លួនក៏មិនថោកជាង៩០លានផោន (ឬ១២៣លានដុល្លារ) ដែរ។

• ខ្សែការពារវ័យ២៩ឆ្នាំ Kalidou Koulibaly របស់ក្លិប Napoli ។ Man City អាចនឹងចាយលុយមិនក្រោម៩០ លានផោន (ឬ១២៣លានដុល្លារ) នោះទេដើម្បីទិញរនាំងការពាររូបនេះមករួមក្រុម ។

• រួមទាំងចង់បានគោលដៅធំរបស់ Barcelona គឺខ្សែប្រយុទ្ធកណ្តាលវ័យ២២ឆ្នាំ Lautaro Martinez របស់ក្លិប Inter Milan ។ ស្របពេលដែលក្លិប Barca កំពុងតែជួបបញ្ហាហិរញ្ញវត្ថុធ្ងន់ធ្ងរនោះ ក្លិប Man City កំពុងតែឆ្មក់យកកីឡាករជើងស៊ុតរូបនេះមកទឹកដីរបស់ខ្លួននៅរដូវក្ដៅនេះ ដោយក្លិប Inter Milan បានដាក់តម្លៃខ្លួនរូបគេរហូតដល់ទៅ ៩៨.៨លានផោន (ឬប្រមាណ១២៤លានដុល្លារ) ឯណោះ។

ដោយឡែកក្លិប Manchester City ក៏កំពុងត្រៀមបន្តកិច្ចសន្យាជាមួយកីឡាករឆ្នើមៗរបស់ក្លិបដូចជាកីឡាករ Kevin De Bruyne, Raheem Sterling និង Gabriel Jesus ជាដើម៕

ប្រភព៖ dailymail