ខេត្តស្វាយរៀង ៖ ស្ត្រីម្នាក់ត្រូវភ្លើងសាំងឆាបឆេះរលាករលួយពេញខ្លួនដោយសារយកប៊ីដុងសាំងទៅចាក់ផ្ទេរចូលដបក្បែរចង្ក្រានបាយបណ្តាលឱ្យផ្ទុះឆាបឆេះផ្ទះអស់សល់តែផេះ និងឆេះខ្លួនប្រាណរលាករលួយស្ទើរតែស្លាប់ ។ ហេតុការណ៍នេះបានកើតឡើងកាលពីថ្ងៃទី២៩ មីនា វេលាម៉ោង៩ព្រឹកនៅភូមិត្រពាំងរំដេញ ឃុំត្រពាំងស្តៅ ស្រុករមាសហែក ។
តាមបុរសជាប្តីឈ្មោះស្រី សារ៉ុន អាយុ៣៥ឆ្នាំ បានប្រាប់កោះសន្តិភាពថា ប្រពន្ធគាត់ដែលជាស្ត្រីរងគ្រោះឈ្មោះយិន ថន អាយុ២៩ឆ្នាំ មានកូន៣នាក់ ។ មុនពេលកើតហេតុរូបគាត់ជាប្តីកំពុងធ្វើអណ្តូងស្នប់នៅខាងក្រោយផ្ទះ រីឯ កូនៗទាំងបីនាក់ក៏នៅទីនោះដែរ ចំណែកប្រពន្ធរបស់គាត់បានទៅទិញសាំងចំនួន៣លីត្រដើម្បីយកមកចាក់ម៉ាស៊ីនបូមទឹកដាក់ស្រូវប្រាំង ដោយដាក់ក្នុងប៊ីដុងសាំងចំណុះ៥លីត្ររបស់អ្នកលក់សាំងមកផង ។ ពេលមកដល់ផ្ទះក៏ផ្ទេរសាំងពីប៊ីដុងចាក់ចូលក្នុងដបក្បែរចង្ក្រានដែលកំពុងដាំបាយចម្ងាយប្រមាណជាមួយម៉ែត្រ ភ្លាមនោះអណ្តាភ្លើងក្នុងចង្ក្រានក៏ឆាបឆេះសាំងក្នុងប៊ីដុងបណ្តាលឱ្យផ្ទុះស្រោចពេញខ្លួនហើយស្ត្រីរងគ្រោះខំលូនចេញពីផ្ទះបាយមកក្រៅទើបរូបគាត់ជាប្តីឃើញភ្លើងកំពុងតែឆេះប្រពន្ធយ៉ាងខ្លាំងក៏ប្រញាប់ប្រញាល់ចូលយកភួយជ្រលក់ទឹករួចយកទៅគ្របលើប្រពន្ធដើម្បីពន្លត់តែភ្លើងមិនទាន់រលត់ភ្លាមទេ ។
ចំណែកកូនៗស្រែកទ្រហោយំលាន់ឮទ្រហឹងនិងស្រែកហៅអ្នកជិតខាងឱ្យមកជួយដោយនាំគ្នាយកសារុងមកជ្រលក់ទឹកហើយយកទៅដាក់លើខ្លួនទើបរលត់ ។ ប្រពន្ធបានសន្លប់ស្តូកស្តឹង រីឯផ្ទះក៏ឆាបឆេះពេញបន្ទុកដោយសារ ម្នាក់ៗព្យាយាមជួយពន្លត់ភ្លើងដែលឆេះមនុស្សទម្រាំរកធុងទឹកបាន ម្យ៉ាងខែប្រាំងខ្សត់ទឹកទម្រាំសប់ពីអណ្តូងស្នប់បានយកមកជះពន្លត់ក៏ភ្លើងឆេះពេញបន្ទុកទៅហើយ ។ ផ្ទះដែលក្លាយជាចំណីភ្លើងមានទទឹង៤ម៉ែត្រគុណ៥ម៉ែត្រផ្ទះតៀមសង់ពីឈើ ដំបូលស័ង្កសីជញ្ជាំងស្លឹកត្នោត រនាបឫស្សី រួមទាំងទ្រព្យធនស្រូវអង្ករសម្លៀកបំពាក់ មុងកន្ទេល ខ្នើយចាន ឆ្នាំង តុ ទូ ក៏ត្រូវអគ្គិភ័យឆេះអស់គ្មានសល់ ។ រីឯជនរងគ្រោះត្រូវបានបញ្ជូនទៅមន្ទីរពេទ្យស្រុករមាសហែកតែដោយស្ថានភាពរលាកធ្ងន់ធ្ងរទើបបញ្ជូនមកមន្ទីរពេទ្យខេត្តដើម្បីសង្គ្រោះបន្ត ៕
ស្រីណា កោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]