ពិភពលោកបំបែកកំណត់ត្រាថ្មី ដែលមានអ្នកឆ្លង COVID-19 ច្រើនបំផុតក្នុងរយៈពេល ២៤ម៉ោង

ហ្សឺណែវ៖ អង្គការសុខភាពពិភពលោក (WHO) នៅថ្ងៃអាទិត្យម្សិលមិញបានរាយការណ៍ថា ពិភពលោកទាំងមូលរកឃើញអ្នកឆ្លងជំងឺកូវីដ-១៩ រហូតដល់ទៅ ២៣០,៣៧០នាក់ ក្នុងរយៈពេល ២៤ម៉ោង។ នេះបើតាមការចេញផ្សាយរបស់សារព័ត៌មានអន្ដរជាតិ Reuters ថ្ងៃទី១២ ខែកក្កដា ឆ្នាំ២០២០។

យោងតាមរបាយការណ៍ប្រចាំថ្ងៃ ការកើនឡើងខ្ពស់បំផុតនេះ ភាគច្រើនបានកត់ត្រាចេញពីសហរដ្ឋអាមេរិក ប្រេស៊ីល ឥណ្ឌា និងអាហ្រ្វិកខាងត្បូង។ ខណៈដែលកំណត់ត្រានៅថ្ងៃទី១០ ខែកក្កដា ឆ្នាំ២០២០ អ្នកឆ្លងថ្មីទូទាំងពិភពលោកក្នុងមួយថ្ងៃមានចំនួនត្រឹមតែ ២២៨,១០២នាក់ប៉ុណ្ណោះ។ តែយ៉ាងណាមិញ ករណីស្លាប់នៅថេរ ពោលគឺប្រហែល ៥,០០០ក្នុងមួយថ្ងៃ ។

គួរបញ្ជាក់ថា ចាប់តាំងពីការផ្ទុះឡើង​​​​​​ដំបូង​​​​ ហើយបានបន្លាយពេលជាង៧ខែមកនេះ  អ្នកឆ្លងជំងឺកូវីដ-១៩ទូទាំងពិភពលោក បានកើនលើស ១៣លាននាក់ហើយ ដោយក្នុងនោះអ្នកស្លាប់មានជាង ៥៧ម៉ឺននាក់។ ក្នុងនោះដែរ សហរដ្ឋអាមេរិកជាប្រទេសរងគ្រោះខ្លាំងបំផុត ដែលរ៉ាប់រងករណីឆ្លងជាង ៣.៤លាននាក់ និងស្លាប់ជាង ១៣ម៉ឺននាក់៕