បរទេស៖ បើតាមរបាយការណ៍បានឲ្យដឹងថាក្លិប Inter Milan កំពុងតែតាមប្រមាញ់កីឡាករអ្នកនាំលេងរបស់ក្លិបតោខៀវ Chelsea គឺកីឡាករជម្រើសជាតិបារាំង N’Golo Kante ដែលជាអតីតកូនក្រុមរបស់លោកគ្រូបង្វឹក Antonio Conte នៅទីផ្សារដោះដូរកីឡាករដ៏ខ្លីខាងមុខនេះ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្លិប Chelsea បានចេញមកបញ្ជាក់កាលពីដើមរដូវកាលថានឹងមិនលក់កីឡាករឆ្នើមរូបនេះទេ ប៉ុន្តែបន្ទាប់ពីបង្ហាញទម្រង់លេងមិនសូវបានល្អនៅក្រោមការដឹកនាំរបស់លោក Frank Lampard ឥឡូវនេះក្លិបកំពុងតែធ្វើការប្តូរចិត្តហើយ។
បើតាមកាសែតរបស់អ៊ីតាលី Gazzetta dello Sport បានបន្ថែមទៀតថាដោយសារតែ Kante មានរបួសច្រើន ក៏ដូចជា មានការផ្លាស់ប្តូរកីឡាករថ្មីៗល្អៗច្រើននៅ Chelsea នោះ វាបានធ្វើឲ្យកីឡាកររូបនេះបាត់បង់តំណែងជាកូនសោរសំខាន់សម្រាប់ក្លិបដែលមានមូលដ្ឋាននៅតីក្រុងឡុងដ៍មួយនេះ។
ដោយឡែកលោក Antonio Conte កំពុងតែបង្ហាញចំណាប់អារម្មណ៍យ៉ាងខ្លាំងក្នុងការនាំយកអតីតកូនក្រុមរបស់ខ្លួនរូបនេះមករួមនឹងក្លិបយក្សអ៊ីតាលី Inter Milan នារដូវក្ដៅនេះ។ គួររម្លឹកដែរថាលោក Conte និងសិស្សសំណប់របស់លោកកីឡាករ N’Golo Kante បានឈ្នះពាន Premier League ចំនួន1លើកជាមួយគ្នាកាលពីលោកនៅដឹងនាំ Chelsea ចន្លោះពីឆ្នាំ២០១៦ដល់២០១៨ ។
យ៉ាងណាមិញកីឡាករវ័យ២៩ឆ្នាំរូបនេះនៅសល់កុងត្រាជាមួយក្លិបរហូតដល់ឆ្នាំ២០២៣ឯណោះ ហើយក្លិប Inter ក៏ត្រូវត្រៀមលុយធំផងដែរក្នុងការទិញផ្តាច់រូបគេពី Chelsea ។ បើតាមរបាយការណ៍បានបន្ថែមទៀតថា Kante ទទួលបានតម្លៃពលកម្ម ពីក្លិបរហូតដល់ទៅ២៩មុឺនផោន (ឬប្រមាណជា៣៧មុឺនដុល្លារ) ក្នុងមួយសប្តាហ៍៕
ប្រភព៖ metro