រុស្ស៊ីនិងអាមេរិកកំពុងបង្កើនការលក់អាវុធទៅឲ្យឥណ្ឌា បន្ទាប់ពីមានភាពតានតឹងជាមួយ​ចិនជុំវិញបញ្ហាព្រំដែន

បរទេស៖ ប្រទេសរុស្ស៊ីនិងសហរដ្ឋអាមេរិក កំពុងតែប្រកួតប្រជែងគ្នាក្នុងការលក់សព្វាវុធទៅឲ្យប្រទេសឥណ្ឌា ខណៈដែល​រដ្ឋធានីញូវដេលី កំពុងព្យាយាមជំរុញការផ្គត់ផ្គង់អាវុធ​លើកងយោធារបស់ខ្លួន ​ក្រោយពីមានភាពតានតឹងជាមួយទីក្រុងប៉េកាំង។ នេះបើយោងតាម​ទីភ្នាក់ងារសារព័ត៌មាន ​scmp ថ្ងៃទី១១ ខែ កក្កដា។

កាលពីសប្តាហ៍មុននេះ រដ្ឋាភិបាលឥណ្ឌា បានប្រញាប់ប្រញាល់លើការស្នើសុំ ទិញយន្តហោះចម្បាំងរបស់រុស្ស៊ីចំនួន ៣៣គ្រឿង និងបង្កើនសមត្ថភាព (Upgrade) យន្តហោះចម្បាំង ៥៩គ្រឿងផ្សេងទៀត ដែលមានតម្លៃសរុប ២.៤៣​ពាន់លានដុល្លារ។ លើសពីនេះ ឥណ្ឌាក៏បានចុះកិច្ចព្រមព្រៀង​ ​ក្នុងទំហំទឹកប្រាក់ ៥.៤៣ពាន់លានដុល្លារ ដើម្បីទិញប្រព័ន្ធមីស៊ីលការពារដែនអាកាស S-400 របស់រុស្ស៊ីដែរ។

​ប្រទេសរុស្ស៊ីគឺជាអ្នកផ្គត់ផ្គង់អាវុធដ៏សំខាន់បំផុត សំរាប់ប្រទេសឥណ្ឌា​ចាប់តាំងពីឆ្នាំ ២០០០មកម៉្លេះ។ ​ហើយបើគិតរហូតមកដល់ពេលនេះ រុស្ស៊ីអាច​រកចំណូលបានប្រមាណ ៣៥ពាន់លានដុល្លារ ពីការលក់អាវុធឱ្យទៅឥណ្ឌា ខណៈដែលសហរដ្ឋអាមេរិកលក់អាវុធឱ្យទៅឥណ្ឌាបានត្រឹមតែ ៣.៩ពាន់លានដុល្លារប៉ុណ្ណោះ ក្នុងរយៈពេលជាង ២០ឆ្នាំនេះ។

សូមជម្រាបផងដែរថា អាវុធយុទ្ធសាស្រ្ត​ភាគច្រើន ដែលឥណ្ឌា​​ប្រើប្រាស់របស់រុស្ស៊ី ​រួមមាន នាវាដឹកយន្តហោះចម្បាំង​ INS Vikramaditya យន្តហោះចម្បាំង MiG-29 យន្តហោះ Ka-31 នាវាមុជទឹក Chakra-2 រថក្រោះ T-90 និង T-72 ។ ​ចំណែករបស់អាមេរិក មានដូចជា  យន្តហោះ Boeing C-17 និងយន្តហោះ C-130J ហើយ​រដ្ឋាភិបាលឥណ្ឌាក៏បានសន្យា​ ថានឹងទិញអាវុធអាមេរិកបន្ថែមទៀតដែរ នៅពេលខាងមុខ៕