អីយ៉ាស់! Man Utd កំពុងតាមប្រមាញ់គោលដៅធំរបស់ Chelsea ម្នាក់នេះដែរហើយ

អង់គ្លេស៖ ក្លិប Manchester United ត្រូវបានគេរាយការណ៍មកថាកំពុងតែត្រៀមខ្លួនចូលប្រជែងជាមួយក្លិប Chelsea ក៏ដូចជាក្លិប Manchester City ដើម្បីតាមទិញរនាំងការពាររបស់ក្លិប Leicester City គឺកីឡាករសញ្ជាតិអង់គ្លេស Ben Chilwell ។

លោក Ole Gunnar Solskjaer បានដាក់ឈ្មោះ Ben Chilwell ក្នុងបញ្ជីកីឡាករដែលជាគោលដៅធំរបស់ក្លិប ដោយនឹងត្រូវទិញមករួមក្រុមនៅទីផ្សារដោះដូរកីឡាករដ៏ខ្លីខាងមុខនេះ។ យ៉ាងណាមិញ Leicester បានដាក់ថ្លៃកីឡាកររូបនេះរហូតដល់ទៅ៦០លានផោន (ឬប្រមាណ៧៦លានដុល្លារ) ឯណោះ ហើយប្រសិនបើក្លិបបិសាចក្រហមមួយនេះទិញបាន Chilwell​ មែននោះ កីឡាករ Luke Shaw ដែលជាជម្រើសទី១របស់លោក Solskjaer សព្វ ថ្ងៃនោះ ទំនងអាចនឹងរកផ្លូវចាកចេញហើយ។

ដោយឡែកលោកគ្រូបង្វឹក Frank Lampard នៅតែជឿជាក់ថាក្លិប Chelsea អាចនឹងមានប្រៀបជាងក្លិបទាំងពីរនេះក្នុងការនាំយកកីឡាករវ័យ២៣ឆ្នាំ មករួមក្រុមនៅរដូវកាលថ្មីខាងមុខ។ ជាមួយគ្នានេះដែរក្លិប Man City ក៏កំពុងតែចង់ពង្រឹងបន្ថែមនៅតំបន់ខ្សែការពារស្លាបឆ្វេងរបស់ក្លិប ដោយលោក Pep Guadiola កំពុងមានចំណាប់អារម្មណ៍ខ្ពស់ចង់ទិញ Chilwell មកទឹកដី Etihad ផងដែរ ដើម្បីយកមកជំនួសកីឡាករ Benjamin Mendy ដែលកំពុងធ្លាក់ទម្រង់លេងដោយសារមានរបួសច្រើនពេក។

ជាការពិតណាស់ Chilwell គឺជាតួរសំខាន់ម្នាក់ក្នុងការជួយឲ្យ Leicester អាចរក្សាតំណែងលេខ៤សម្រាប់កៅអីពានរង្វាន់​ Champions League នៅឆ្នាំក្រោយ។ ហើយប្រសិនជារូបគេត្រូវចាកចេញពីក្លិបពិតមែននោះ វាជាការបាត់បងដ៏ធំរបស់ក្លិបកញ្ជ្រោងខៀវមួយនេះ។ ជាក់ស្តែង Ben Chilwell នៅសល់កុងត្រាជាមួយក្លិបរហូតដល់ឆ្នាំ២០២៤ឯណោះ ដោយបានបង្ហាញខ្លួនសរុបឲ្យ Leicester នៅ Premier League បាន១២៣ប្រកួត៕

ប្រភព៖ dailymail