បរទេស៖ តិកតុកនិយាយថា ខ្លួនបានលុបចោលវីដេអូជាង៤៩លាន ដែលបានរំលោភបំពានគោលការណ៍របស់ខ្លួន ចន្លោះខែកក្កដានិងខែធ្នូ ឆ្នាំ២០១៩។ កម្មវិធីនេះបាននិយាយទៀតថា ប្រហែលមួយភាគបួននៃវីដេអូទាំងនោះត្រូវបានគេលុបចោល ដោយសារតែសកម្មភាពអាក្រាតកាយ ឬសកម្មភាពផ្លូវភេទ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសហរដ្ឋអាមេរិកបានលើកឡើងថា ខ្លួនកំពុងពិចារណា ថាតើគួរហាមឃាត់កម្មវិធី ដែលគ្រប់គ្រងដោយជនជាតិចិនដែរឬអត់។ កាលពីថ្ងៃចន្ទ រដ្ឋមន្ត្រីក្រសួងការបរទេសសហរដ្ឋអាមេរិក លោក Mike Pompeo បានលើកឡើងថា ការទាញយកកម្មវិធីតិកតុក នឹងត្រូវបានគ្រប់គ្រងព័ត៌មានឯកជនរបស់ពលរដ្ឋ នៅក្នុងដៃបក្សកុម្មុយនិស្ដចិន។
ចំណែក រដ្ឋាភិបាលនៅក្នុងប្រទេសឥណ្ឌាបានហាមឃាត់កម្មវិធីនេះរួចទៅហើយ ដោយលើកឡើងពីការព្រួយបារម្ភ អំពីសន្តិសុខតាមអ៊ីនធឺណេត។
តិកតុកជាកម្មសិទ្ធរបស់ក្រុមហ៊ុនចិន ByteDance។ កម្មវិធីនេះមិនមានវត្តមាននៅក្នុងប្រទេសចិនទេ ប៉ុន្តែក្រុមហ៊ុន ByteDance បានដាក់ឲ្យដំណើរការកម្មវិធីស្រដៀងគ្នានេះ ហៅថា Douyin ដែលអាចប្រើប្រាស់បានក្នុងប្រទេសចិន។ តិកតុកបាននិយាយថា ខ្លួនមិនបានទទួលសំណើរទិន្នន័យរបស់រដ្ឋាភិបាលឬប៉ូលិសណាមួយ ពីប្រទេសចិន ឬក៏សំណើរណាមួយពីរដ្ឋាភិបាល ដើម្បីលុបខ្លឹមសារនោះទេ។
កាលពីថ្ងៃព្រហស្បតិ៍ កាសែត The Wall Street Journal បានចេញផ្សាយពីរបាយការណ៍មួយ ដែលលើកឡើងថា អាជីវកម្មនេះកំពុងគិតអំពីការបង្កើតទីស្នាក់ការថ្មីមួយ នៅខាងក្រៅប្រទេសចិន៕