តៃប៉ិ៖ ក្រសួងការបរទេសនិយាយថា សហរដ្ឋអាមេរិកបានចុះកិច្ចព្រមព្រៀងលើកញ្ចប់ថវិកាចំនួន ៦២០លានដុល្លារ ក្នុងការជួយអភិវឌ្ឍសមត្ថភាពប្រព័ន្ធការពារមីស៊ីលបន្ថែមឲ្យកោះតៃវ៉ាន់ ដើម្បីទប់ទល់នឹងការគំរាមកំហែង ដែលកំពុងកើនឡើងពីសំណាក់ប្រទេសចិន។ នេះបើយោងតាមការផ្សាយរបស់ទីភ្នាក់ងសារព័ត៌មាន Reuters ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
សហរដ្ឋអាមេរិក ក៏ដូចជាប្រទេសភាគច្រើនទៀត គឺមិនមានទំនាក់ទំនងការទូតជាផ្លូវការជាមួយកោះតៃវ៉ាន់ទេ ប៉ុន្តែវាត្រូវបានចងភ្ជាប់ដោយច្បាប់ ដើម្បីផ្តល់នូវកោះប្រជាធិបតេយ្យជាមួយនឹងមធ្យោបាយក្នុងការការពារខ្លួន ខណៈដែលប្រទេសចិន បានចាត់ទុកកោះមួយនេះ គឺជាដែនដីស្ថិតនៅក្រោមការគ្រប់គ្រងរបស់ខ្លួនជាយូរយារណាស់មកហើយ។
កោះតៃវ៉ាន់បានស្នើសុំទិញគ្រឿងបរិក្ខាមួយចំនួន ក្នុងគោលបំណងបង្កើនសមត្ថភាពប្រព័ន្ធមីស៊ីលការពារឈ្មោះថា Patriot ដើម្បីឲ្យវាអាចដំណើរការបន្តរហូតដល់ទៅ ៣០ឆ្នាំបន្ថែមទៀត។ ហើយក្នុងនោះក្រុមហ៊ុនផលិតសព្វាវុធអាមេរិក Lockheed Martin នឹងទទួលយកគម្រោងអភិវឌ្ឍសមត្ថភាពប្រព័ន្ធអាវុធនេះ ដែលសរុបជាទឹកប្រាក់ប្រមាណ ៦២០លានដុល្លារ។
សូមជម្រាបផងដែរថា បច្ចុប្បន្នកោះតៃវ៉ាន់បាននឹងកំពុងបង្កើនសមត្ថភាពយោធា ក៏ដូចជាពង្រឹងប្រព័ន្ធការពាររបស់ខ្លួន ដោយការបញ្ជាទិញសព្វាវុធទំនើបៗពីសហរដ្ឋអាមេរិក ដើម្បីស្កាត់ពីសកម្មភាពគំរាមកំហែងកាន់តែខ្លាំងឡើងៗ ពីសំណាក់ទីក្រុងប៉េកាំង ដែលតែងធ្វើសមយុទ្ធកងទ័ពអាកាសនិងកងទ័ពជើងទឹក នៅក្បែរកោះតៃវ៉ាន់៕
Bong I.T