ក្រសួង​រំឭកឲ្យពលរដ្ឋយកចិត្តទុក​ដាក់រឿង​ប្រើប្រាស់​ទឹក​ក្នុង​អំឡុង​​​ខែ​​កក្កដា​​នេះ​

ក្រសួងធនធានទឹក​ និងឧតុនិយមថ្មីៗនេះ បានបញ្ជាក់ថា ក្នុងខែកក្កដានេះ (ចាប់ពីពាក់កណ្តាលខែរហូតដល់ចុងខែ) សម្ពាធខ្ពស់បាននឹងកំពុងបង្កើនឥទ្ធិពលមកលើផ្ទៃសមុទ្រប៉ាស៊ីហ្វិកខាងលិច។ លក្ខណៈបែបនេះធ្វើឲ្យបណ្តា​ប្រទេស​ក្នុងតំបន់ដូចជាថៃ កម្ពុជា វៀតណាម ឡាវ មីយ៉ាន់ម៉ា និងហ្វីលីពីន កម្រិតបរិមាណទឹកភ្លៀងធ្លាក់មកមានការថម​ថយ​ចុះ។

ដោយឡែកកម្ពុជា ស្ថានភាពនេះ ក្រសួងធនធានទឹក​ និងឧតុនិយមបានបង្ហើបថា តាមរយៈការព្យាករណ៍អាកាស​ធាតុលើកទី ២ សម្រាប់ឆ្នាំ​២០២០ ក្នុងខែកក្កដានេះនឹងមានកូនរដូវប្រាំងកើតឡើងចាប់ពីពាក់កណ្តាល​ខែរហូត​ដល់ចុងខែ។ បែបនេះ ទើបក្រសួងរំឭកឲ្យពលរដ្ឋមានការយកចិត្តទុកដាក់លើការប្រើប្រាស់ទឹកឲ្យបានល្អ។

ក្រសួងបន្ថែមថា ស្ថានភាពអាកាសធាតុនឹងត្រលប់មកប្រក្រតីវិញ ដោយភ្លៀងក៏នឹងអាចធ្លាក់រាយប៉ាយបានល្អលើ​ផ្ទៃប្រទេស ជាមួយនឹងបរិមាណទឹកភ្លៀងពីមធ្យមទៅច្រើន ក្នុងនោះក៏អាចនឹងបណ្តាលឲ្យខេត្តមួយចំនួន ដែលមាន​ភូមិសាស្ត្រនៅទីទំនាបជាប់ក្បែរតំបន់ជួរភ្នំ តំបន់ខ្ពង់រាប តំបន់ជាប់ផ្លូវទឹក និងតំបន់មាត់សមុទ្រ ប្រឈមខ្ពស់នឹង​ជំនន់​ទឹកភ្លៀងដែលបណ្តាលមកពីការធ្លាក់ភ្លៀងច្រើនលើសលប់ផងដែរ៕