Inter កំពុងចាប់អារម្មណ៍ចង់បានជើងស៊ុត និងរនាំងការពាររបស់ Chelsea ពីររូបនេះ

បរទេស៖ ក្លិបយក្សរបស់អ៊ីតាលី Inter Milan ត្រូវបានគេរាយការណ៍មកថាកំពុងតែមានចំណាប់អារម្មណ៍ចង់បានកីឡាករជួរមុខរបស់ Chelsea ពីររូប គឺកីឡាករជើងស៊ុត Olivier Giroud និងរនាំងការពារ Emerson Palmieri ។

លោកគ្រូបង្វឹក Conte របស់ក្លិប Inter នៅតែចង់បានគោលដៅចាស់របស់ក្លិប គឺតារាវ័យ៣៣ឆ្នាំ Giroud នៅរដូវក្ដៅនេះ បើទោះបីជាកីឡាកររូបនេះទើបតែបន្តកុងត្រាជាមួយ Chelsea ក៏ពិតមែន។

ម៉្យាងវិញទៀត Inter ក៏កំពុងតែចង់បានមិត្តរួមក្រុមរបស់ Giroud ម្នាក់ទៀតផងដែរគឺកីឡាករ Emerson ស្របពេលដែលលោក Frank Lampard កំពុងតែព្យាយាមទិញកីឡាករ Ben Chilwell ពី Leicester មកជំនួសតំណែងរបស់តារាកូនកាត់ ប្រេស៊ីល- អ៊ីតាលី រូបនេះ។

ជាមួយគ្នានេះដែរ Chelsea ក៏កំពុងតែព្យាយាមលក់កីឡាករមួយចំនួនដើម្បីបង្គ្រប់លុយទិញយកតារាវ័យក្មេងដែលកំពុងឡើងជើងរបស់ក្លិប Bayer Leverkusen គឺកីឡាករ Kai Havertz ដែលកីឡាករសញ្ជាតិអាល្លឺម៉ង់ វ័យ ២១ឆ្នាំរូបនេះមានតម្លៃខ្លួនដល់ទៅ៩០លានផោន (ឬប្រមាណ១១៤លានដុល្លារ) ឯណោះ៕

ប្រភព៖ dailymail