តំណែង Top 4 កាន់តែក្ដៅហើយ! Leicester ធ្លាក់មកលេខ៤វិញ ក្រោយស្មើគ្នាជាមួយ Arsenal (មានវីដេអូ)

អង់គ្លេស៖ ក្រុមកញ្ជ្រោងខៀវ Leicester City បានធ្លាក់មកឈរលេខ៤វិញ ក្រោយទទួលបានលទ្ធផលស្មើគ្នា ១ទល់នឹង១ ជាមួយក្រុមកាំភ្លើងធំ Arsenal ។

ក្នុងការប្រកួតដែលប្រព្រឹត្តទៅនៅកីឡដ្ឋាន Emirates កាលពីម្សិលមិញ ក្រុមម្ចាស់ផ្ទះ Arsenal ជាអ្នកបើកគណនីនាំមុខមុន នៅនាទីទី ២១ រកបានតាមរយៈខ្សែប្រយុទ្ធ Pierre-Emerick Aubameyang ។ ជាមួយគ្នានេះ ក្រុមភ្ញៀវ ក៏ព្យាយាមវាយបកវិញផងដែរ តែមិនមានសំណាង ដោយបណ្ដោយឲ្យតង់ទី១ បញ្ចប់ទៅ​ក្នុងលទ្ធផល១ទល់នឹង០។

លុះឈានចូលដល់តង់ទី២ ការប្រកួតកាន់តែមានភាពតានតឹង ក្រុមទាំងពីរបានធ្វើការសម្រុកគ្នាច្រើនជាងមុន ក្នុងនោះនៅនាទីទី៧៥ Arsenal បានបាត់បង់សមាជិកម្នាក់ ដោយខ្សែប្រយុទ្ធវ័យក្មេង Edward Nketiah ដែលទើបប្ដូរចូលបាន៤នាទីនោះ ត្រូវអាជ្ញាកណ្ដាល សញ្ជាតិអង់គ្លេស លោក Chris Kavanagh ពិន័យកាតក្រហមបណ្ដេញចេញពីការប្រកួត ក្រោយកីឡាកររូបនេះ បើកបាតឈុះចំជើង ខ្សែការពារក្រុម Leicester កីឡាករ James Justin។

បន្ទាប់ពី Arsenal សល់គ្នាត្រឹម១០នាក់ ក្រុមលោក Brendan Rodgers មិនបង្អង់យូរ បានបង្កើនការសម្រុកទៅលើក្រុមម្ចាស់ផ្ទះ យ៉ាងគំហុក ជាលទ្ធផលនៅនាទីទី៨៤ ខ្សែប្រយុទ្ធ Jamie Vardy រកគ្រាប់បាល់តាមស្មើ បានសម្រេច។

យ៉ាងណាមិញ លទ្ធផលនេះ បានទាញក្រុម Leicester ទម្លាក់ពីលេខ៣ មកឈរលេខ៤ រក្សាគម្លាតតែ៤ពិន្ទុប៉ុណ្ណោះជាមួយ ក្រុមលេខ៥ Manchester United ខណៈក្រុមបិសាចក្រហម នៅមិនទាន់ធ្វើការប្រកួតក្របខណ្ឌ Premier League សប្ដាហ៍ទី៣៤នេះនៅឡើយទេ។

គួរឲ្យដឹងដែរថា ១គ្រាប់កាលពីយប់មិញ បានធ្វើឲ្យខ្សែប្រយុទ្ធ Aubameyang ក្លាយជាកីឡាករទី២ របស់​ Arsenal ដែលស៊ុតបានមិនក្រោម២០គ្រាប់ ក្នុង១រដូវកាលនៅ Premier League ខណៈកីឡាករដំបូងគេបង្អស់ដែលធ្វើបែបនេះបាន គឺអតីតជម្រើសជាតិបារាំង Thierry Henry៕

សូមទស្សនាវីដេអូ សង្ខេបនៃការប្រកួត ខាងក្រោមនេះ៖