ប្រេស៊ីល៖ ប្រធានាធិបតីប្រេស៊ីល លោក Jair Bolsonaro បានធ្វើតេស្ដវិជ្ជមាន ចំពោះវីរុសកូរ៉ូណា។ វាជាការធ្វើតេស្ដលើកទី៤របស់គាត់ ដែលបានធ្វើឡើងកាលពីថ្ងៃចន្ទ បន្ទាប់ពីការវិវត្តរោគសញ្ញា រួមទាំងសីតុណ្ហភាពខ្ពស់។ ការធ្វើតេស្ដ៣លើកមុនរបស់គាត់ ចំពោះវីរុសនេះ មានលក្ខណៈអវិជ្ជមាន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Bolsonaro បានប្រលែងលេងម្ដងហើយម្ដងទៀត នូវហានិភ័យនៃអ្វីដែលគាត់ហៅថា «ជំងឺផ្ដាសាយតិចតួច» ដោយនិយាយទៀតថា គាត់នឹងមិនរងផលប៉ះពាល់ធ្ងន់ធ្ងរទេ។ កន្លងមក គាត់បានប្រឆាំងនឹងការបិទប្រទេស ដោយគាត់និយាយថា វាធ្វើឲ្យប៉ះពាល់ដល់សេដ្ឋកិច្ច។
គួរបញ្ជាក់ផងដែរថា ប្រទេសប្រេស៊ីលមានករណីឆ្លងជំងឺកូវីដ-១៩ ខ្ពស់ជាងគេលំដាប់ទី២ បន្ទាប់ពីសហរដ្ឋអាមេរិក។
កាលពីថ្ងៃអង្គារ លោក Bolsonaro បានធ្វើការប្រកាសនៅក្នុងបទសម្ភាសន៍តាមទូរទស្សន៍ ដោយនិយាយថា គ្រុនក្ដៅដែលគាត់កំពុងតែមានបានធូរស្រាល ហើយគាត់មានអារម្មណ៍ថាប្រសើរ។ គាត់បានចាប់ផ្ដើមមានរោគសញ្ញា កាលពីថ្ងៃអាទិត្យ ហើយមានសីតុណ្ហភាពខ្ពស់ ក្អក និងមានអារម្មណ៍ថាមិនស្រួលខ្លួន។ គាត់បានបន្ថែមទៀតថា កាលពីថ្ងៃចន្ទ គាត់មានអាការៈកាន់តែយ៉ាប់យ៉ឺន ដែលជាហេតុនាំឲ្យគាត់ធ្វើតេស្ដរកវីរុសកូរ៉ូណា។
លោក Bolsonaro ស្ថិតនៅក្នុងក្រុមដែលមានហានិភ័យខ្ពស់ ដោយសារតែគាត់មានអាយុ៦៥ឆ្នាំ។ គាត់ក៏ធ្លាប់បាននិយាយដែរថា គាត់បានប្រើថ្នាំ hydroxychloroquine និង azithromycin ដើម្បីព្យាបាលជំងឺផងដែរ។ ប៉ុន្តែ វាមិនមានប្រសិទ្ធភាពប្រឆាំងនឹងមេរោគនោះទេ៕