ចំនួនអ្នកឆ្លងកូវីដ១៩ នៅសហរដ្ឋអាមេរិក បន្តកើនឡើងដល់ជាង៣លាននាក់ ច្រើនជាងគេនៅលើពិភពលោក

ញូវយ៉ក៖ បច្ចុប្បន្ននេះ ស្ថានភាពនៃជំងឺ​ឆ្លងកូវីដ១៩ ហាក់មិនទាន់ធូរស្រាលនៅឡើយទេ។ ហើយប្រសិនបើយើងក្រឡេកទៅមើលប្រទេស​ជាច្រើននៅទូទាំងពិភពលោក គឺយើងអាច​ឃើញថា ជំងឺដ៏កាចសាហាវនេះ បានឆក់យកជីវិតមនុស្សរាប់ម៉ឺននាក់ ក្នុងចំណោមអ្នកឆ្លងជំងឺ​រាប់លាននាក់។

ជាក់ស្ដែង បើយោង​តាមទិន្ន័យពីសាកលវិទ្យាល័យ ចន ហប់ឃីនស៍ (Johns Hopkins) បានឱ្យដឹងថា ​មកទល់ពេលនេះ ចំនួនអ្នកឆ្លងជំងឺកូវីដ១៩ នៅសហរដ្ឋអាមេរិក បានបន្តកើនឡើងដល់ ៣,០៤០,៨៣៣នាក់ ខណៈចំនួនអ្នកស្លាប់កើនឡើងដល់ ១៣២,៩៧៩នាក់ ដែលធ្វើឱ្យប្រទេសនេះ ក្លាយជាប្រទេសរងគ្រោះដោយជំងឺកូវីដ១៩ ខ្លាំងជាងគេបំផុតនៅលើពិភពលោក។

សូមជម្រាបផងដែរថា ញូវយ៉កគឺជារដ្ឋ​រងគ្រោះខ្លាំងជាងគេនៅក្នុងសហរដ្ឋអាមេរិក ដែលមានចំនួនអ្នកឆ្លងជំងឺកូវីដ១៩ រហូតដល់ទៅជាង ៣៩ម៉ឺននាក់ និងអ្នកស្លាប់ជាង ៣ម៉ឺនាក់។ ចំណែករដ្ឋមួយចំនួនទៀត ដែលមានករណីឆ្លងជំងឺប្រហែល​ត្រឹម ១០ម៉ឺននាក់ រួមមាន រដ្ឋកាលីហ្វ័រញ៉ា ​ផ្លរីដា​ តិចសាស់​ ញូវជឺស៊ី​ អ៊ីលីណយ​ ម៉ាសាឈូសេត និងរដ្ឋអារីហ្សូណា៕