អង់គ្លេស៖ នៅក្នុងការប្រកួតយប់មិញក្លិប Tottenham Hotspur ទទួលបាន៣ពិន្ទុបន្ថែម ក្រោយពីយកឈ្នះក្លិប Everton ដោយលទ្ធផល១ទល់នឹង០។ គ្រាប់បាល់បានកើតឡើងនៅនាទីទី២៤ដោយការភ្លាត់ធ្វើឲ្យបាល់ចូលទីខ្លួនឯងពីសំណាក់កីឡាករ Michael Keane របស់ Everton ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមួយគ្រាប់នេះបានធានា៣ពិន្ទុឲ្យ Spurs តាមប្រដេញជាមួយក្លិបកាំភ្លើងធំ Arsenal នៅលើតារាង Premier League។ ប៉ុន្តែ៣ពិន្ទុនេះវាហាក់ដូចជាមិនបានធ្វើឲ្យអ្នកគាំទ្រ ក៏ដូចជាក្លិបទាំងមូលសប្បាយចិត្តនោះទេ ដោយសារ តែការទាស់គ្នាឯងរវាង Hugo Lloris និង Son Heung-min ។
នៅពេលដែលអាជ្ញាកណ្តាលផ្លុំកញ្ចែបញ្ចប់ការប្រកួតតង់ទី១ កីឡាករ Hugo Lloris បានរត់សំដៅទៅរក Son ដោយកំហឹង រួចក៏ច្រានគ្នាជាមួយពាក្យសម្តីដែលបង្ហាញពីភាពមិនសប្បាយចិត្តលើរឿងអ្វីមួយ ប៉ុន្តែត្រូវបានមិត្តរួមក្រុមឯទៀតចូលមកជួយឃាត់។
មូលហេតុដែលធ្វើឲ្យ Lloris ខឹងសម្បានឹង Son នោះគឺមកពី Son បានធ្វើឲ្យខូចបាល់ ដោយបណ្តោយឲ្យកីឡាករ Richarlison មានឱកាសស៊ុតនៅប៉ុន្មាននាទីមុននឹងបញ្ចប់ តង់ទី១។
យ៉ាងណាមិញមុនពេលចាប់ផ្តើមតង់ទី២ រូបគេទាំងពីរបានសម្របសម្រួលគ្នាវិញដោយបានធ្វើការឱបគ្នា ពុំមានកំហឹងទៀតនោះទេ។ ជាក់ស្តែងកាយវិការរបស់ Hugo Lloris បែបនេះ គ្រាន់តែចង់បង្ហាញពីភាពយកចិត្តទុកដាក់ខ្លាំងនៅក្នុងការប្រកួតប៉ុណ្ណោះ ក្នុងនាមជាកីឡាករ៕
ប្រភព៖ givemesport