ដោយទើបទទួលដំណឹងល្អ ផែនការជីកយករ៉ែនៅឋានព្រះចន្ទ អាចនឹងចាប់ផ្ដើម នៅឆ្នាំ២០២៥

អាមេរិក៖ ផែនការនៃការចាប់ផ្ដើមរុករករ៉ែនៅឋានព្រះចន្ទ នៅដើមឆ្នាំ២០២៥ កាន់តែទាក់ទាញចំណាប់អារម្មណ៍ខ្លាំងជាងមុន នៅក្នុងសប្ដាហ៍នេះ បន្ទាប់ពីក្រុមការងាររបស់អង្គការណាសាបានរកឃើញភស្តុតាង ដែលបញ្ជាក់ថា ព្រះចន្ទដែលជាផ្កាយរណបធម្មជាតិរបស់ផែនដី អាចនឹងមានរ៉ែនៅក្រោមផ្ទៃរបស់វាកាន់តែច្រើន ជាងការគិតពីមុនៗ។

ដោយប្រើប្រាស់ទិន្នន័យពីឧបករណ៍ Miniature Radio Frequency (Mini-RF) ពីលើយានអង្កេត Lunar Reconnaissance Orbiter (LRO) របស់អង្គការណាសា ក្រុមអ្នកស្រាវជ្រាវបានឈានមកដល់សេចក្ដីសន្និដ្ឋានថា ផ្ទៃផ្នែកខាងក្រោមរបស់ព្រះចន្ទមានកំហាប់ខ្ពស់ នៃលោហៈមួយចំនួន ដូចជាដែកនិងទីតានីញ៉ូមច្រើនជាងការប៉ាន់ស្មាន។ ការសិក្សានេះត្រូវបោះពុម្ពផ្សាយនៅក្នុងទិនានុប្បវត្តិ Earth and Planetary Science Letters។

ភស្តុតាងនេះត្រូវបានគេរកឃើញ ខណៈពេលដែលអ្នកវិទ្យាសាស្ត្រកំពុងស្វែងរកទឹកដែលបានកកនៅខាងក្រោមផ្ទៃរណ្ដៅ នៅតំបន់ប៉ូលខាងជើងព្រះចន្ទ។ អ្នកស្រាវជ្រាវបានរកឃើញថា គំរូរណ្ដៅដែលធំជាងនិងជ្រៅជាងអាចនឹងមានកំហាប់ដែកខ្ពស់ ជាងរណ្ដៅដែលតូចនិងរាក់។

កាលពីខែមេសា ប្រធានាធិបតីអាមេរិក ដូណាល់ ត្រាំ បានចុះហត្ថលេខាលើបទបញ្ជាមួយ ដោយជំរុញឲ្យមនុស្សធ្វើការជីកយករ៉ែពីព្រះចន្ទ និងនៅទីអវកាសផ្សេងៗទៀត៕