ឥណ្ឌាបានរាយការណ៍ ករណីឆ្លងជំងឺកូវីដ-១៩ខ្ពស់បំផុត ដែលមិនធ្លាប់មាន កាលពីថ្ងៃសៅរ៍

ឥណ្ឌា៖ ក្រសួងសុខាភិបាលនិងសុខុមាលភាពគ្រួសាររបស់ឥណ្ឌាបាននិយាយ កាលពីថ្ងៃសៅរ៍ថា ប្រទេសឥណ្ឌាបានកត់ត្រាករណីឆ្លងវីរុសកូរ៉ូណាប្រភេទថ្មី ចំនួន២២,៧៧១នាក់ ក្នុងរយៈពេល២៤ម៉ោងកន្លងមកនេះ ដែលជាការកើនឡើងប្រចាំថ្ងៃខ្ពស់បំផុតរបស់ប្រទេស ចាប់តាំងពីមានការផ្ទុះរាតត្បាត។

ចំនួនករណីឆ្លងសរុបដែលបានបញ្ជាក់នៅក្នុងប្រទេសឥណ្ឌាឥឡូវនេះ មានចំនួន៦៤៨,៣១៥នាក់ និងមានអ្នកស្លាប់ចំនួន១៨,៦៥៥នាក់។ មនុស្សជាង៣៩៤,២០០នាក់បានជាសះស្បើយពីជំងឺនេះ ប៉ុន្តែមានមនុស្សកំពុងផ្ទុកជំងឺនេះចំនួន២៣៥,៤៣៣នាក់ ក្នុងពេលឥឡូវ។

យោងតាមក្រុមប្រឹក្សាស្រាវជ្រាវវេជ្ជសាស្ត្រឥណ្ឌាបានឲ្យដឹងថា ការធ្វើតេស្ដជាង៩លាននាក់ ត្រូវបានប្រព្រឹត្តឡើងនៅក្នុងប្រទេស ដោយកាលពីថ្ងៃសុក្រតែឯង មានចំនួនការធ្វើតេស្ដរហូតដល់២៤២,៣៨៣៕