ជប៉ុន៖ ប្រព័ន្ធផ្សព្វផ្សាយក្នុងស្រុក NHK របស់ជប៉ុន បានរាយការណ៍ថា ប្រជាជនប្រមាណ ៧៥,០០០នាក់ ដែលរស់នៅភាគខាងលិចប្រទេសជប៉ុន ត្រូវបានអាជ្ញាធរជម្លៀសទៅរកទីកន្លែងសុវត្ថិភាពនៅថ្ងៃសៅរ៍នេះ ដោយសារភ្លៀងធ្លាក់ខ្លាំង បង្កឱ្យមានទឹកជំនន់និងការបាក់ដី បណ្តាលឱ្យមនុស្សជាច្រើនត្រូវជាប់គាំង ខណៈមនុស្ស ១៣នាក់ផ្សេងទៀតបានបាត់ខ្លួន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រភពខាងលើបានឱ្យដឹងទៀតថា ក្រុមអ្នកជួយសង្គ្រោះកំពុងស្វែងរកមនុស្ស ៣នាក់ ដែលបានខ្លួននៅក្នុងខេត្ត Kumamoto បន្ទាប់ពីផ្ទះរបស់ពួកគេ ត្រូវបានបាក់ស្រុតហើយកប់នៅក្រោមដី។ ចំណែកសេវាកម្មរថភ្លើងមួយចំនួន រួមទាំងប្រតិបត្តិការរថភ្លើងល្បឿនលឿន Shinkansen ក៏ត្រូវបានអាជ្ញាធរប្រកាសឱ្យផ្អាកការធ្វើដំណើរនៅក្នុងតំបន់ផងដែរ។
គួរជម្រាបផងដែរថា បច្ចុប្បន្នប្រទេសជប៉ុនកំពុងស្ថិតនៅក្នុងរដូវវស្សា ដែលតែងតែបង្កជាទឹកជំនន់ និងការបាក់ដីជាដើម។ ទន្ទឹមនឹងនេះ ទីភ្នាក់ងារអាកាសធាតុជប៉ុន ក៏បានចេញការព្រមានកម្រិតខ្ពស់បំផុត និងស្នើសុំឱ្យប្រជាជនទាំងអស់មានការប្រុងប្រយ័ត្ន ដោយសារភ្លៀងធ្លាក់ខ្លាំង នឹងនៅតែបន្តកើតមានឡើង៕