រណ្ដៅសពដ៏ធំត្រូវបានជីក សម្រាប់បញ្ចុះសពកម្មករអណ្ដូងរ៉ែជាង១៧០នាក់ នៅមីយ៉ាន់ម៉ា

មីយ៉ាន់ម៉ា៖ កម្មករជីករ៉ែជាង ១៧០នាក់ ដែលបានស្លាប់ក្នុងគ្រោះរអិលបាក់ដីកាលពីពេលថ្មីៗនេះ ត្រូវបានគេបញ្ចុះនៅក្នុងរណ្ដៅរួមគ្នាដ៏ធំមួយ កាលពីថ្ងែសុក្រម្សិលមិញ។ នេះបើយោងតាមដកស្រង់ពីទីភ្នាក់ងារសារព័ត៌មាន CNA នៅថ្ងៃទី ០៤ ខែកក្កដា ឆ្នាំ២០២០ ។

នៅជុំវិញរណ្ដៅសព គេសង្កេតឃើញសាច់ញាតិរបស់ជនរងគ្រោះ បានចូលរួមសម្តែងការសោកស្តាយចំពោះការបាត់បង់មនុស្សជាទីស្រលាញ់របស់ពួកគេ ខណៈអ្នកខ្លះបានទ្រហោយំឱបក្ដាមឈូសយ៉ាងសង្វេគ ព្រោះជាគ្រោះមហន្ដរាយដ៏អាក្រក់បំផុត ដែលមិនធ្លាប់កើតមាន។

គួររម្លឹកថា សោកនាដកម្មដ៏អាក្រក់បំផុតនេះ បានកើតឡើងកាលពីថ្ងៃព្រហស្បតិ៍ នៅ​ក្នុង​តំបន់ ​Hpakant ក្នុង​រដ្ឋ Kachin ភាគខាងជើងប្រទេសមីយ៉ាន់ម៉ា បន្ទាប់ពីមាន​ភ្លៀងធ្លាក់មួយមេធំហើយបង្កជាគ្រោះរអិលស្រុតដី ខណៈ​កម្មករកំពុងធ្វើការ។

យោងតាមនាយកដ្ឋានពន្លត់អគ្គិភ័យបានឲ្យដឹងថា បេសកកម្មស្វែងរក និងជួយសង្គ្រោះនៅតែបន្ដមកទល់ថ្ងៃនេះ ហើយសាកសពចំនួន ១៧២នាក់ត្រូវបានរកឃើញ ខណៈសាកសពផ្សេងទៀតសង្ស័យនៅកប់ក្រោមគំនរដីភក់នៅឡើយ៕

សូមទស្សនារូបភាពខាងក្រោម៖