វ៉ាស៊ីនតោន៖ កងទ័ពជើងទឹករបស់សហរដ្ឋអាមេរិក នឹងបញ្ជូននាវាដឹកយន្តហោះចំនួន ២គ្រឿង រួមជាមួយនាវាចម្បាំងជាច្រើនគ្រឿងទៀត ធ្វើដំណើរទៅកាន់សមុទ្រចិនខាងត្បូងក្នុងរយៈពេលប៉ុន្មានថ្ងៃខាងមុខ ដើម្បីចូលរួមក្នុងសមយុទ្ធយោធាមួយ។ នេះបើយោងតាមការផ្សាយរបស់ទីភ្នាក់ងារសារព័ត៌មាន CNN ថ្ងៃទី ០៤ ខែកក្កដា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោក Joe Jeiley អ្នកនាំពាក្យរបស់កងនាវាទី៧ (Seventh Fleet) បានលើកឡើងយ៉ាងដូច្នេះថា៖
វត្តមាននៃការធ្វើសមយុទ្ធយោធារបស់កងទ័ពជើងទឹកអាមេរិក នៅក្នុងសមុទ្រហ្វីលីពីន និងសមុទ្រចិនខាងត្បូង គឺមិនមែនជាការឆ្លើយតបទៅនឹងព្រឹត្តិការណ៍នយោបាយ ឬព្រឹត្តិការណ៍ពិភពលោកណាមួយនោះទេ។ ប៉ុន្តែវាគឺជាមធ្យោបាយមួយក្នុងចំណោមមធ្យោបាយជាច្រើនទៀត ដែលអាមេរិកត្រូវធ្វើ ដើម្បីលើកកម្ពស់ សន្តិសុខ ស្ថេរភាព និងវិបុលភាពពាសពេញតំបន់ឥណ្ឌូប៉ាស៊ីហ្វិក។ ហើយវាក៏អាចជាឱកាសល្អមួយ សំរាប់កងទ័ពអាមេរិកធ្វើការហ្វឹកហាត់ ក៏ដូចជាពង្រឹងសមត្ថភាពរបស់ខ្លួនដែរ។
គួរជម្រាបផងដែរថា សមយុទ្ធនេះត្រូវបានគ្រោងទុកជាយូរមកហើយ ប៉ុន្តែវាត្រូវធ្វើឡើង ចំពេលដែលប្រទេសចិនធ្វើសមយុទ្ធយោធារបស់ខ្លួននៅក្នុងដែនទឹកមានជម្លោះ ក្បែរប្រជុំកោះ Paracel ដែលការធ្វើសមយុទ្ធនោះទៀតសោធន៍ ត្រូវរងការរិះគន់ពីសំណាក់ វៀតណាម ហ្វីលីពីន និងសហរដ្ឋអាមេរិក ថាជាការបង្កហេតុយ៉ាងខ្លាំង ហើយក៏ជារឿងមិនអាចទទួលយកបានដែរ៕
Bong I.T