ចូលរួមសោកស្តាយ! ឪពុករបស់កំពូលអ្នកប្រយុទ្ធក្នុងទ្រុង Khabib បានទទួលមរណភាពដោយសារកូវីដ១៩

បរទេស៖ លោក Abdulmanap Nurmagomedov ជាគ្រូបង្វឹក និងជាឪពុករបស់ម្ចាស់ជើងឯកខ្សែក្រវ៉ាត់ទម្ងន់ស្រាល Khabib Nurmagomedov បានទទួលមរណភាពហើយនៅទីក្រុងម៉ូស្គូ។

ហេតុការណ៍នេះ ត្រូវបានអ្នកគ្រប់គ្រងរបស់ Khabib បញ្ជាក់ប្រាប់កាសែត ESPN កាលពីថ្ងៃសុក្រ។ លោក Nurmagomedov បានចូលសម្រាកព្យាបាលក្នុងមន្ទីរពេទ្យនៅទីក្រុងម៉ូស្គូ តាំងពីខែឧសភាមកម្ល៉េះ នៅពេលគេធ្វើរោគវិនិច្ឆ័យឃើញថាគាត់មានផ្ទុកវីរុសកូរ៉ូណា។ បន្ថែមពីនេះ ជំងឺកូវីដក៏បានធ្វើទុក្ខទៅលើបេះដូងរបស់គាត់ផងដែរ រហូតឈានដល់ការវះកាត់។

ទាក់ទិនទៅនឹងការស្លាប់របស់ឪពុក Khabib លោក Abdelaziz បាននិយាយយ៉ាងក្រៀមក្រំកាលពីថ្ងៃសុក្រថា៖

ជាមួយគ្នានេះដែរ Khabib មិនទាន់បង្ហោះសារអ្វីជាសារធារណៈជុំវិញការបាត់បង់ឪពុករបស់គាត់នៅឡើយទេ។  អ្នកប្រយុទ្ធក្បាច់គុនចម្រុះ Khabib បានសាងកេរ្តិ៍ឈ្មោះជាច្រើនជាមួយឪពុករបស់គេ និងជោគជ័យខ្លាំងនៅក្នុងវិស័យកីឡាមួយនេះ។

គួរឲ្យដឹងដែរថា បន្ថែមពីលើភាពជោគជ័យរបស់កូនប្រុសគាត់ លោក Abdulmanap Nurmagomedov ក៏ធ្លាប់ជួយយឹតយោង អត្តពលិកជាច្រើននៅក្នុងតំបន់ផងដែរ ដូចជាកីឡាករ Islam Makhachev ដែលកំពុងរះជាដើម៕

ប្រភព៖ ESPN