ជប៉ុនដាក់​ឱ្យប្រើ​រថភ្លើងល្បឿនលឿនថ្មី ដែល​​នៅតែអាចដំណើរការទោះ​កំពុងមានគ្រោះរញ្ជួយដី​

តូក្យូ៖ ប្រទេសជប៉ុនបានប្រកាសដាក់ឱ្យប្រើប្រាស់រថភ្លើងថ្មីមួយប្រភេទ ដែលមិនត្រឹមតែមានល្បឿនលឿននិងផាសុខភាពប៉ុណ្ណោះទេ ប៉ុន្តែវាមានសមត្ថភាពពិសេស អាចដឹកអ្នកដំណើរទៅដល់ទីកន្លែងសុវត្ថិភាព បើទោះបីស្ថិតនៅ​ក្នុងខណៈពេលកើតមានគ្រោះរញ្ជួយដីក៏ដោយ។

រថភ្លើងរបស់ជប៉ុនថ្មីនេះ មានឈ្មោះថា N700S វាត្រូវបានដាក់ឱ្យដំណើរការកាលពីថ្ងៃទី ១ ខែកក្កដា ​ដោយរត់ពីស្ថានីយ៍ Tokaido Shinkansen ក្នុងទីក្រុងតូក្យូ ឆ្ពោះទៅស្ថានីយ៍ Shin-Osaka ទីក្រុងអូសាកា។

N700S អាចរត់បានក្នុងល្បឿនរហូតដល់ទៅ ៣៦០ គីឡូម៉ែត្រក្នុងមួយម៉ោង ដែលធ្វើឱ្យវាក្លាយជារថភ្លើងលឿនបំផុតមួយនៅលើពិភពលោក។ ប៉ុន្តែទោះជាយ៉ាងណាក៏ដោយ ​អាជ្ញាធរជប៉ុន​នឹងដាក់កំណត់ឱ្យវារត់ត្រឹម ២៨៥ គីឡូម៉ែត្រក្នុងមួយម៉ោងប៉ុណ្ណោះ។

​នៅក្នុងរថភ្លើងនេះ គឺមាន​​កៅអី​អង្គុយធំទំលាយ និងមានផាសុខភាពជាងមុន ហើយកៅអីនីមួយៗ មានរន្ធភ្លើង​​​សំរាប់អ្នកដំណើរទាំងអស់ប្រើប្រាស់។ បន្ថែមពីនេះ កន្លែងដាក់ឥវ៉ាន់ ដែលស្ថិតនៅខាងលើកន្លែងអង្គុយ ក៏មាន​បំភ្លឺភ្លើងស្វ័យប្រវត្តិ និងមានទីតាំងធំទូលាយជាងមុនផងដែរ។

រថភ្លើងនេះមានប្រព័ន្ធគ្រប់គ្រងនិងប្រព័ន្ធហ្វ្រាំងស្វ័យប្រវត្ដិ ដែលអនុញ្ញាតឱ្យវាអាច​ឈប់បានលឿន ក្នុងករណីមានអាសន្ន។ ហើយពិសេសជាងនេះទៀត វា​ក៏បានបំពាក់មកជាមួយ​ប្រព័ន្ធថាមពលបណ្តោះអាសន្ន ដែលអាចឱ្យរថភ្លើង​​បន្តដំណើរទៅដល់កន្លែងសុវត្ថិភាពក្នុងរយៈចម្ងាយជិត​ ប្រសិនបើ​ចរន្តអគ្គិសនីទាំងអស់ ត្រូវបានកាត់ផ្តាច់កំឡុងពេលមានគ្រោះរញ្ជួយដី៕