​វៀតណាម​និងហ្វីលីពីន រិះគន់ចំពោះការធ្វើសមយុទ្ធយោធារបស់ចិន នៅក្នុងដែនទឹក​មានជម្លោះ

ម៉ានីល៖ កាលពីថ្ងៃព្រហស្បតិ៍ម្សិលមិញនេះ ប្រទេសវៀតណាម និងហ្វីលីពីន បានធ្វើការប្រឆាំងចំពោះសកម្មភាពធ្វើសមយុទ្ធយោធារបស់​ចិន ​នៅ​តំបន់​សមុទ្រ​ចិន​ខាងត្បូង​ ព្រមទាំងបាន​រិះគន់ថា សកម្មភាពនេះអាចបង្កើនភាពតានតឹងនៅក្នុងតំបន់ ​ក៏ដូចជាប៉ះពាល់ដល់ទំនាក់ទំនង​ទីក្រុងប៉េកាំងជាមួយប្រទេសជិតខាង។

រដ្ឋមន្រ្តីក្រសួងការពារជាតិហ្វីលីពីនលោក Delfin Lorenzana បាន​និយាយថា សមយុទ្ធរបស់ចិននៅក្នុងដែនទឹកក្បែរប្រជុំកោះ Paracel គឺជាការបង្កហេតុយ៉ាងខ្លាំង ខណៈក្រសួងការបរទេសវៀតណាម បាន​អះអាងថា វាជាការរំលោភអធិបតេយ្យភាព ដែលអាចបង្ក​អន្តរាយដល់ទំនាក់ទំនងទីក្រុងប៉េកាំងជាមួយសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន។

ប្រទេសចិនបានគ្រោងធ្វើសមយុទ្ធរយៈពេល ៥ ថ្ងៃចាប់ពីថ្ងៃពុធ នៅជិតប្រជុំកោះ Paracel ។ ប៉ុន្តែទោះបីជាយ៉ាងណាក្តី ​​វៀតណាមនិងហ្វីលីពីន នៅតែប្រឆាំងដាច់ខាតចំពោះសមយុទ្ធយោធា​​​នេះ ដោយ​ចោទប្រកាន់ថា វាជាការរំលោភឈ្លានពានរបស់ចិននៅសមុទ្រចិនខាងត្បូង និងការមិនគោរពព្រំដែន ដែលបានចែងនៅក្នុងច្បាប់សមុទ្រអន្តរជាតិ។

គួរជម្រាបផងដែរថា ទីក្រុងហាណូយ និងម៉ានីល បានធ្វើការព្រមានទៅលើប្រទេសចិន ​ចំពោះបង្កភាពអសន្តិសុខនៅក្នុងតំបន់អាស៊ីអាគ្នេយ៍។ ចំណែក​សហរដ្ឋអាមេរិកក៏​មានការព្រួយបារម្ភ​​ផងដែរថា ប្រទេសចិនបាននឹងកំពុងឆ្លៀតឱកាស​ពេលជំងឺកូវីដ១៩កំពុងរាត្បាត ​ដើម្បីបង្កើនសកម្មភាពកងទ័ពជើងទឹក និងជំរុញការទាមទារទឹកដីរបស់ខ្លួន៕