កាន់តែធ្ងន់ធ្ងរ! អាមេរិករកឃើញអ្នកឆ្លងCOVID-19 ច្រើនជាង«៥ម៉ឺននាក់»ក្នុងមួយថ្ងៃ ជាចំនួនខ្ពស់បំផុតលើកដំបូង

អាមេរិក៖ កាលពីថ្ងៃពុធម្សិលមិញនេះ សហរដ្ឋអាមេរិកបានកត់ត្រាពីករណីឆ្លងថ្មីនៃជំងឺកូវីដ-១៩ ច្រើនជាង ៥០,០០០នាក់ក្នុងមួយថ្ងៃ ដែលជាចំនួនខ្ពស់បំផុតលើកដំបូង។ នេះបើតាមការដកស្រង់ពីសារព័ត៌មាន វ៉ាស៊ីនតោនប៉ុស្ដិ៍ ថ្ងៃទី០២ ខែកក្កដា ឆ្នាំ២០២០។

តាមរយៈទិន្ឋន័យសរុបដែលប្រមូលបានពីរដ្ឋនានានៃសហរដ្ឋអាមេរិកនៅថ្ងៃពុធ បានរកឃើញករណីឆ្លងថ្មីរហូតទៅដល់ ៥២,៧៨៨នាក់ ដែលភាគច្រើនទទួលបានពីរដ្ឋ Texas, Arizona, North Carolina និង Georgia ខណៈចំនួន ៩,៧៤០ករណីទទួលបានពីរដ្ឋ California ។ ហើយក្រោយពីមានករណីឆ្លងថ្មីកើនឡើងគួរឲ្យបារម្ភបែបនេះ រដ្ឋបាលរដ្ឋនានារួមទាំងរដ្ឋ California នៅថ្ងៃពុធម្សិលមិញនេះ បានប្រកាសបិទទីតាំងបារ និងកន្លែងបម្រើសេវាកម្មនានា ដើម្បីទប់ស្កាត់រោគរាតត្បាតនេះផងដែរ។

គួរជម្រាបថា ចំនួនករណីឆ្លងនៅសហរដ្ឋអាមេរិកបានកើនឡើងយ៉ាងខ្លាំងកាលពីខែមិថុនាកន្លងទៅ ដែលមានប្រមាណ ៨០០,០០០នាក់ នៅពេលរដ្ឋនានាព្យាយាមបន្ធូរបន្ថយវិធានការដាច់ដោយឡែក ហើយចាប់ផ្ដើមបើកអាជីវកម្មពួកគេឡើងវិញ។

យ៉ាងណាមិញ យោងតាមទិន្ឋន័យដែលទទួលបានពីសកលវិទ្យាល័យ Johns Hopkins គិតត្រឹមព្រឹកនេះ សហរដ្ឋអាមេរិកមានករណីឆ្លងសរុបចំនួន ២,៦៨៦,២៤៩នាក់ ស្លាប់ចំនួន ១២៨,០៦២នាក់ និងជាសះស្បើយជាង១លាននាក់៕