វ៉ាស៊ីនតោន៖ ប្រធានដឹកនាំកម្មវិធីបានប្រកាសថា គម្រោងធ្វើតេស្តប្រព័ន្ធអាវុធឡាស៊ែរនៅលើយន្តហោះចម្បាំងរបស់កងទ័ពអាកាសអាមេរិក ត្រូវបានពន្យារពេលរហូតដល់ឆ្នាំ ២០២៣ ដោយសារបញ្ហាបច្ចេកទេស និងផលវិបាកដែលបណ្តាលមកពីការឆ្លងរាលដាលនៃជំងឺកាចសាហាវកូវីដ១៩។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោក Jeff Heggemeier អ្នកដឹកនាំកម្មវិធីនៃមន្ទីរស្រាវជ្រាវរបស់កងទ័ពអាកាសបានលើកឡើងយ៉ាងដូច្នេះថា៖
កម្មវិធីធ្វើតេស្តប្រព័ន្ធអាវុធឡាស៊ែរការពារខ្លួនរបស់កងទ័ពអាកាសអាមេរិក ហៅកាត់ថា SHiELD ដើមឡើយមានគម្រោងធ្វើតេស្តដំបូងនៅឆ្នាំ ២០២១ ប៉ុន្តែការសាកល្បងនេះ ត្រូវបានពន្យាពេលរហូតដល់ឆ្នាំ ២០២៣ ដោយសារជំងឺកូវីដ១៩។ ប្រព័ន្ធអាវុធឡាស៊ែរ គឺជាបច្ចេកវិទ្យាដ៏ស្មុគស្មាញបំផុតមួយ និងត្រូវប្រើរយៈពេលយូរ ហើយកម្មវិធីយើងកំពុងរៀបចំឡើងនេះ គឺជាការអភិវឌ្ឍអាវុធទំនើបបំផុត ដែលមានសមត្ថភាពគ្រប់គ្រាន់ អាចដាក់ដំណើរការនៅក្នុងជួរកងទ័ពអាកាសអាមេរិកបាន។
គួររម្លឹកផងដែរថា កាលពីថ្ងៃទី ២៤ ខែឧសភា កន្លងទៅ សហរដ្ឋអាមេរិកធ្លាប់ទទួលបានជោគជ័យម្តងរួចទៅហើយ ក្នុងការធ្វើតេស្តអាវុធឡាស៊ែរនៅលើនាវាចម្បាំង។ ដោយឡែក សំរាប់កម្មវិធី SHiELD របស់សហរដ្ឋអាមេរិកថ្មី គឺមានគោលដៅ ផលិតអាវុធឡាស៊ែរដ៏ខ្លាំងក្លាមួយប្រភេទដាក់លើយន្តហោះចម្បាំង ដើម្បីទប់ទល់នឹងមីស៊ីលដែលបាញ់ដោយយន្តហោះ ឬប្រព័ន្ធការពារដែនអាកាសរបស់សត្រូវ។ ហើយនៅពេលអនាគត ប្រទេសមហាអំណាចមួយនេះ ក៏អាចនឹងផលិតអាវុធឡាស៊ែរថ្មី ដើម្បីប្រើជាប្រព័ន្ធការពារដែនអាកាសរបស់ខ្លួនបន្ថែមទៀតដែរ៕
Bong I.T