វៀតណាម៖ កំពុងហែលទឹកសុខៗ ស្រាប់តែ​សិស្សសាលា ៣ នាក់លង់​ទឹក​ទន្លេស្លាប់

ហាណូយ៖ ប្រព័ន្ធផ្សព្វផ្សាយក្នុងស្រុកបានរាយការណ៍នៅថ្ងៃពុធនេះថា ក្មេងស្រី ៣ នាក់បានលង់ទឹកស្លាប់ ពេលកំពុងហែលនៅក្នុងទឹកទន្លេមួយនៅខេត្ត Ha Tinh ភាគកណ្តាលនៃប្រទេសវៀតណាម។

កាសែតក្នុងស្រុក Phap Luat បានដកស្រង់សម្តីពីអាជ្ញាធរមូលដ្ឋានថា ជនរងគ្រោះទាំង ៣ នាក់ដែលជាសិស្សថ្នាក់ទី ៦ នៃសាលាមួយ ក្នុងស្រុក Duc Tho នៃខេត្ត Ha Tinh បានលង់ទឹកស្លាប់ពេលកំពុងងូតទឹក នៅក្នុងទន្លេកាលពីរសៀលថ្ងៃអង្គារ។

កាសែតដដែលបានបន្តថា អ្នករស់នៅក្បែរនោះបានមកដល់កន្លែងកើតហេតុដើម្បីជួយសង្គ្រោះ ប៉ុន្តែសិស្សសាលាទាំងនោះបានលង់ទឹកជ្រៅនៅក្នុងទន្លេ ហើយសាកសពរបស់ពួកគេត្រូវបានរកឃើញនៅថ្ងៃតែមួយ នៅវេលាម៉ោងប្រហែល ៦ ល្ងាច ម៉ោង​ក្នុងស្រុក។

យោងតាមក្រសួងការងារ សង្គមកិច្ច និង យុវនិតិសម្បទាបានឲ្យដឹងថា ជាមធ្យមកុមារចំនួន ២,០០០ នាក់នៅក្នុងប្រទេសវៀតណាមបានស្លាប់ដោយសារលង់ទឹកជារៀងរាល់ឆ្នាំ ដែលបណ្តាលឱ្យវាក្លាយជាបុព្វហេតុនៃការស្លាប់ដែលទាក់ទងនឹងកុមារនៅក្នុងប្រទេស៕

ប្រភព៖ ទីភ្នាក់ងារសារព័ត៌មានស៊ីនហួរ