អាមេរិក៖ អ្នកឯកទេសជាន់ខ្ពស់ផ្នែកជំងឺឆ្លងរបស់រដ្ឋាភិបាលសហរដ្ឋអាមេរិកបានព្រមានថា ករណីឆ្លង COVID-19 នៅសហរដ្ឋអាមេរិកអាចឈានដល់ ១០ម៉ឺននាក់ក្នុងមួយថ្ងៃ ដូច្នេះប្រជាជនត្រូវបង្កើនការប្រុងប្រយ័ត្នជាងមុន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកបណ្ឌិត Anthony Fauci ដែលជាប្រធានវិទ្យាស្ថានជាតិនៃរោគអាឡែរហ្សី និងជំងឺឆ្លង បានថ្លែងប្រាប់គណៈកម្មាធិការព្រឹទ្ធសភាអាមេរិកកាលពីថ្ងៃអង្គារថា «វាច្បាស់ណាស់ថា ពេលនេះពួកគេមិនស្ថិតក្នុងការគ្រប់គ្រងទាំងស្រុងនោះទេ»។ ជាមួយគ្នានេះ លោកបានជំរុញឲ្យប្រជាជនគោរពតាមការណែនាំដូចជា ការពាក់ម៉ាស់ លាងដៃ និងចៀសវាងកន្លែងដែលមានមនុស្សច្រើនជាដើម។
គួរបញ្ជាក់ថា មួយរយៈចុងក្រោយនេះ សហរដ្ឋអាមេរិកមានករណីឆ្លងថ្មីកើនឡើងក្នុងមួយថ្ងៃៗគួរឲ្យបារម្ភ ជាពិសេសនៅរដ្ឋចំនួន៣៥ រួមមានរដ្ឋផ្លរីដា និងរដ្ឋតិចសាស់ផងដែរ។ ជាក់ស្ដែង យោងតាមទិន្ឋន័យដែលទទួលបានពីសកលវិទ្យាល័យ Johns Hopkins នៅថ្ងៃចន្ទកន្លងទៅ សហរដ្ឋអាមេរិកបានកត់ត្រាករណីឆ្លងថ្មីរហូតដល់ទៅ៤១,៥៥៦នាក់ឯណោះក្នុងមួយថ្ងៃ។
យ៉ាងណាមិញ លោក Joe Biden ជាបេក្ខជនប្រធានាធិបតីប្រជាធិបតេយ្យបានរិះគន់លោក ដូណាល់ ត្រាំ ចំពោះការឆ្លើយតបនឹងវិបត្ដិថ្មីនេះ។ តួយ៉ាង ថ្លែងទៅកាន់ក្រុមអ្នកសារព័ត៌មានកាលពីថ្ងៃអង្គារ លោក Biden បាននិយាយថា «លោក ត្រាំ ទំនងជាលើកទង់.ស ហើយចាកចេញពីសមរភូមិ ទោះបីគាត់ហៅខ្លួនឯងថាជាប្រធានាធិបតីក្នុងសម័យនេះក៏ដោយ»៕