អាមេរិកទិញយន្តហោះចម្បាំង F-35C ចំនួន៤គ្រឿង ក្នុងតម្លៃ៣៦០លានដុល្លារ

វ៉ាស៊ីនតោន៖ ​ក្រសួងការពារជាតិរបស់សហរដ្ឋអាមេរិក បាន​សម្រេចចុះកិច្ចព្រមព្រៀង​ជាមួយក្រុមហ៊ុនផលិតសព្វាវុធ Lockheed Martin ​ក្នុង​ទំហំទឹកប្រាក់​រហូតដល់ទៅ ៣៦០លានដុល្លារ ដើម្បីទិញយន្តហោះចម្បាំង​ប្រភេទ F-35C ចំនួន ៤ គ្រឿង។

យោងតាមក្រុមហ៊ុនផលិតសព្វាវុធខាងលើ ដែលមានទីតាំងនៅសហរដ្ឋអាមេរិកនេះបានឱ្យដឹងថា យន្តហោះចម្បាំងត្រកូល F-35C គឺជាប្រភេទយន្តហោះមានស្លាប​​ធំ និងមានជើងចុះចតរឹងមាំជាងប្រភេទ F-35។​ ហើយជាពិសេសវាអាចបំបាំងកាយបានឆ្ងាយ​ ដែលស័ក្តិសមរាល់បេសកកម្មសំខាន់ៗរបស់កងយោធាអាមេរិក។

គួរជម្រាបផងដែរថា កាលពីខែមីនា ក្រុមហ៊ុនផលិតសព្វាវុធ Lockheed Martin ធ្លាប់បានលក់យន្តហោះចម្បាំងប្រភេទ F-35 ចំនួន ៧៨គ្រឿង ក្នុងទំហំទឹកប្រាក់ជាង ៤ពាន់លានដុល្លារ ទៅឱ្យកងយោធា​អាមេរិក។ ហើយចំណែកកុងត្រាក្នុងគម្រោងផលិតយន្តហោះ F-35C ថ្មីនេះ អាច​នឹងរួចរាល់នៅខែឧសភាឆ្នាំ ២០២៣៕