គួរឲ្យភ្ញាក់ផ្អើល! ប៉ូលខាងត្បូងបានកើនកម្ដៅ ៣ដងនៃមធ្យមភាគសកល ក្នុងរយៈពេល៣០ឆ្នាំកន្លងមក

បរទេស៖ ការសិក្សាស្រាវជ្រាវថ្មីមួយបានរកឃើញថា តំបន់ប៉ូលខាងត្បូងមានការឡើងកម្ដៅច្រើនជាង៣ដង នៃមធ្យមភាគសកល ក្នុងរយៈពេល៣០ឆ្នាំកន្លងមកនេះ។ នោះអាចមានផលប៉ះពាល់ធំធេង ចំពោះការរលាយផ្ទាំងទឹកកកអង់តាក់ទិក ជីវិតសត្វសមុទ្រនៅក្នុងតំបន់ និងការកើនឡើងនៃកម្ពស់ទឹកសមុទ្រពិភពលោក។

ការសិក្សានេះបានស្រាយបំភ្លឺ នៅតំបន់ដាច់ស្រយាលបំផុត នៅលើផែនដី។ ខណៈដែលអ្នកវិទ្យាសាស្ត្របានដឹងអស់រយៈពេលជាច្រើនឆ្នាំមកហើយថា តំបន់ខាងក្រៅនៃអង់តាក់ទិកកំពុងឡើងកម្ដៅ ពួកគេធ្លាប់គិតពីមុនថា ប៉ូលខាងត្បូងបានដាច់ឆ្ងាយ ពីការកើនឡើងសីតុណ្ហភាពរបស់ពិភពលោក។

ក្រុមអ្នកវិទ្យាសាស្ត្របានវិភាគទិន្នន័យពីស្ថានីយ៍អាកាសធាតុនៅប៉ូលខាងត្បូង ក៏ដូចជាគំរូអាកាសធាតុ ដើម្បីពិនិត្យមើលការឡើងកម្ដៅនៅផ្នែកខាងក្នុងនៃទ្វីបអង់តាក់ទិក។ ពួកគេបានរកឃើញថា នៅចន្លោះឆ្នាំ១៩៨៩និង២០១៨ ប៉ូលខាងត្បូងបានឡើងកម្ដៅប្រមាណ១.៨អង្សាសេ ក្នុងរយៈពេល៣០ឆ្នាំចុងក្រោយនេះ ដោយមានអត្រា +០.៦អង្សាសេ ក្នុងមួយទសវត្សរ៍ ពោលគឺ៣ដងនៃមធ្យមភាគពិភពលោក។

ក្រុមអ្នកវិទ្យាសាស្ត្របាននិយាយថា មូលហេតុចម្បងនៃការឡើងកម្ដៅផែនដីគឺ ការកើនសីតុណ្ហភាពផ្ទៃសមុទ្រ ដែលមានចម្ងាយរាប់ពាន់គីឡូម៉ែត្រពីតំបន់ត្រូពិក។ ក្នុងរយៈពេលជាង៣០ឆ្នាំកន្លងមកនេះ ការឡើងកម្ដៅនៅមហាសមុទ្រប៉ាស៊ីហ្វិកខាងលិច ដែលជាតំបន់ក្បែរតំបន់អេក្វាទ័រ ភាគខាងជើងនៃប្រទេសអូស្ត្រាលីនិង Papua New Guinea គឺបានកើនឡើងនៃខ្យល់ក្ដៅ ដែលត្រូវបានធ្វើដំណើរទៅកាន់ប៉ូលខាងត្បូង៕