រាជធានីភ្នំពេញ ៖ ជាងកាត់ដេរម្នាក់ត្រូវក្រុមក្មេងស្ទាវព្រួតគ្នាវាយ រហូតដល់សន្លប់បាត់ស្មារតីដេកលើចិញ្ចើមផ្លូវ តាមបណ្ដោយផ្លូវម៉ៅសេទុង ក្នុងសង្កាត់ទួលស្វាយព្រៃ២ ខណ្ឌចំការមន កាលពីវេលាម៉ោង២និង៥នាទីរំលងអធ្រាត្រឈានចូលថ្ងៃទី២ មេសា ២០១២ ខណៈចេញពីរាំនៅក្លឹបឌីស្កូមួយឈ្មោះយ៉ាំង ហ្គើល ដែលមានទីតាំងនៅមិនឆ្ងាយពីកន្លែងកើតហេតុ ។
តាមការឱ្យដឹងពីក្រុមមិត្ដភក្ដិជនរងគ្រោះ ថាជនរងគ្រោះឈ្មោះមឿន សារុំ ភេទប្រុស អាយុ២២ឆ្នាំ ជាជាងកាត់ដេរនៅផ្សារអូរឫស្សី ស្នាក់នៅក្នុងខណ្ឌ៧មករា មានស្រុកកំណើតនៅខេត្ដកំពង់ចាម ។ មុនពេលកើតហេតុជនរងគ្រោះ និងមិត្ដភក្ដិ២នាក់ទៀតឈ្មោះជា និងឈ្មោះថៃបាននាំគ្នាជិះកង់បីទៅចូលរាំនៅក្លឹបយ៉ាំងហ្គើល ឌីស្កូ តែមិនដឹងមានរឿងហេតុអ្វី ឬទំនាស់ជាមួយក្រុមក្មេងស្ទាវនៅក្នុងក្លឹប ទើបពេលចេញមកក្រៅ ស្រាប់តែត្រូវក្រុមក្មេងស្ទាវដេញវាយរងរបួសរហូតដល់សន្លប់ បាត់ស្មារតីដេកស្ដូកស្ដឹងនៅលើចិញ្ចើមផ្លូវបែបនេះ។
តាមប្រភពព័ត៌មានពីសន្ដិសុខយាមក្រុមហ៊ុននៅ ក្បែរកន្លែងកើតហេតុបង្ហើបឱ្យដឹងថា មុនពេលកើតហេតុគេឃើញក្មេងស្ទាវ១ក្រុមមានគ្នា៦ទៅ៧នាក់ ជិះម៉ូតូទំនើបៗចំនួន៣គ្រឿងបានដេញវាយជនរងគ្រោះមានគ្នា៣នាក់ តាមបណ្ដោយផ្លូវម៉ៅសេទុង តែជនរងគ្រោះ២នាក់បានរត់ចូលផ្លូវឌឿងហែម ទើបរួចផុតពីក្រញ៉ាំដៃក្រុមក្មេងស្ទាវ នៅសល់តែជនរងគ្រោះម្នាក់ប៉ុណ្ណោះ ត្រូវបានក្រុមក្មេងស្ទាវទាំងនោះព្រួតគ្នាវាយទាត់ធាក់គ្មានត្រា ប្រណី រហូតដល់ជនរងគ្រោះសន្លប់បាត់ស្មារតី ទើបពួកអន្ធពាលទាំងនោះជិះម៉ូតូគេចខ្លួនបាត់ដោយសុវត្ថិភាព៕
បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
