មនុស្សជាង ១,០០០នាក់ ស្លៀកឈុតហែលទឹក ជិះស្គីលើទឹកកក

កាលពីថ្ងៃសៅរ៍ ទី ២០ ខែមេសា ឆ្នាំ២០១៣នេះ មានភាពភ្ញាក់ផ្អើលបាន កើតឡើងដោយសារតែមាន មនុស្សរាប់រយនាក់ ដែលស្ថិតនៅក្នុងសភាពអាក្រាតពាក់កណ្ដាលខ្លួន បាននាំគ្នាលេងស្គីនៅលើភ្នំ Zelyonaya ក្នុង Kuzbass ប្រទេសរុស្សី ទាំងអាកាសធាតុត្រជាក់។

យោងទៅតាមសារព័ត៌មានបរទេសបានឲ្យដឹងថា អ្នករៀបចំកម្មវិធីនេះ ដែលមានឈ្មោះថា Konstantin Koshin បានប្រាប់ភ្នាក់ងារសារព័ត៌មានថា យ៉ាងហោចណាស់មានមនុស្សជាង ១,០០០នាក់ បានចូលរួមក្នុងកម្មវិធីនេះ ដែលទាំងនេះអាចចាត់ទុកជា កំណត់ត្រាថ្មីរបស់ពិភពលោក នៅក្នុងសៀវភៅ Guinness ។ យ៉ាងណាមិញ សម្រាប់កំណត់ត្រាចាស់ គឺមាននៅក្នុងប្រទេសកាណាដា ដែលមានមនុស្ស ២៥០នាក់ ស្លៀកឈុតហែលទឹក ដើម្បីជិះស្គីលេងនៅលើទឹកកក។

នៅក្នុងនេះផងដែរ អ្នកគ្រប់គ្រងកម្មវិធីនេះ បានបន្ដថា ដំបូងលោករំពឹងទុកថា មានមនុស្សតែ ៥០០នាក់ នោះទេដែលបានចូលរួម តែតាមការពិត វាបានកើនឡើង រហូតដល់លើសពី ១,០០០នាក់ ដែលបាននាំគ្នាស្លៀកឈុតហែលទឹក ក៏ដូចជាប៊ីគីនី ដើម្បីចូលរួមក្នុងលេងស្គីបែបនេះ។

តើប្រិយមិត្ដយល់យ៉ាងណា?

កែសម្រួលដោយ ម៉ា
ខ្មែរឡូត