ញូដេលី៖ ទីភ្នាក់ងារសារព័ត៌មាន រ៉យទ័រ បានរាយការណ៍ថា ត្រឹមរយៈពេល២៤ម៉ោង ប្រទេសឥណ្ឌាបានរកឃើញអ្នកឆ្លងជំងឺកូវីដ១៩ថ្មី ចំនួន ១៧,០០០នាក់ ដែលធ្វើឱ្យតួលេខអ្នកឆ្លងជំងឺសរុបនៅក្នុងប្រទេសនេះ បានកើនឡើងរហូតដល់ទៅ ៥០៩,៤៤៦នាក់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបច្ចុប្បន្ននេះ ឥណ្ឌាគឺជាប្រទេសស្ថិតនៅលំដាប់ទីបួន ក្នុងចំណោមប្រទេសដែលរងគ្រោះដោយជំងឺកូវីដ១៩ ខ្លាំងបំផុតនៅលើពិភពលោក ដូចជា សហរដ្ឋអាមេរិក ប្រេស៊ីល និងរុស្ស៊ី។ ហើយទន្ទឹមនឹងនេះ ក្រុមអ្នកជំនាញបានធ្វើការព្យាករណ៍ថា ប្រសិនបើរដ្ឋាភិបាលមិនចាត់វិធានការតឹងរ៉ឹងឱ្យបានទាន់ពេលវេលាទេនោះ ចំនួនអ្នកឆ្លងជំងឺក្នុងប្រទេសឥណ្ឌា អាចនឹងបន្តកើនឡើងរហូតដល់ជិត១លាននាក់ នៅត្រឹមថ្ងៃទី ១៥ ខែកក្កដា ខាងមុខ។
គួរឱ្យដឹងផងដែរថា គិតមកទល់ពេលនេះ ប្រទេសឥណ្ឌាមានស្លាប់ដោយជំងឺកូវីដ១៩ សរុប ១៥,៦៨៩នាក់ និងអ្នកជាសះស្បើយ ២៩៥,៩១៧នាក់។ ប៉ុន្តែបើទោះករណីឆ្លងជំងឺដ៏កាចសាហាវក្នុងប្រទេសឥណ្ឌា នៅតែបន្តកើនឡើងយ៉ាងណាក៏ដោយ ក៏រដ្ឋាភិបាលប្រទេសនេះ ត្រូវសម្រេចប្រកាសបន្ធូរបន្ថយវិធានការបិទទ្វារប្រទេស ដើម្បីកាត់បន្ថយផលប៉ះពាល់ដ៏ធំធេងទៅលើសេដ្ឋកិច្ច និងប្រជាជនក្រីក្រ ដែលរស់ចិញ្ចឹមជីវិត ដោយពឹងផ្អែកលើប្រាក់ឈ្នួលប្រចាំថ្ងៃ៕