រកមូលហេតុឃើញហើយ! យន្ដហោះធ្លាក់នៅប៉ាគីស្ថាន ស្លាប់មនុស្សជិត១០០នាក់កាលពីខែមុន គឺដោយសារពីឡុតរវល់និយាយគ្នារឿង...

ប៉ាគីស្ថាន៖ កាលពីថ្ងៃសុក្រ ទី២២ ខែឧសភាកន្លងទៅ មានយន្ដហោះប្រភេទ Airbus A320 មួយគ្រឿង បានធ្លាក់ក្នុងតំបន់ទីប្រជុំជននៃទីក្រុងការ៉ាជី បណ្ដាលឲ្យអ្នកដំណើរចំនួន៩៧នាក់ស្លាប់ និង២នាក់នៅមានជីវិត ហើយផ្ទះប្រជាពលរដ្ឋរាប់សិបខ្នងត្រូវខូចខាតយ៉ាងដំណំ។

យ៉ាងណាមិញ ចំពោះរបាយការណ៍ស៊ើបអង្កេតដំបូងបានបង្ហាញថា មូលហេតុដែលបណ្ដាលឲ្យយន្ដហោះនោះធ្លាក់គឺដោយសារ អ្នកបើកយន្ដហោះរវល់ជជែកគ្នាអំពីជំងឺកូវីដ-១៩ ហើយមិនបានយកចិត្ដទុកដាក់ខណៈយន្ដហោះរៀបនឹងចុះចតទៅហើយ។

ទន្ទឹមនឹងនេះ ក្រុមស៊ើបអង្កេតប៉ាគីស្ថាន រួមទាំងមន្ដ្រីដែលមកពីឧស្សាហកម្មអាកាសចរណ៍របស់រដ្ឋាភិបាលបារាំង បានធ្វើការវិភាគទិន្នន័យ​ និងឧបករណ៍ថតសំឡេង ហើយរកឃើញថា ការធ្លាក់នោះពិតជាកំហុសរបស់មនុស្សពិតមែន។ ខណៈអ្នកតំណាងមកពីក្រុមហ៊ុន Airbus ដែលជាក្រុមហ៊ុនផលិតយន្តហោះ និងម៉ាស៊ីន Safran ក៏បានគាំទ្ររបាយការណ៍នេះដែរ។ ប៉ុន្ដែពាក់ព័ន្ធនឹងខឹ្លមសារជាក់លាក់ចំពោះកិច្ចសន្ទនានោះ គេមិនបានបញ្ជាក់ក្នុងរបាយការណ៍ឡើយ។

គួររម្លឹកថា ឧបទ្ទេវហេតុខាងលើនេះ បានកើតឡើងក្រោយប៉ុន្មានថ្ងៃប៉ុណ្ណោះ បន្ទាប់ពីប្រទេសប៉ាគីស្ថានចាប់ផ្ដើមជើងហោះហើរឡើងវិញ ក្រោយពីការរាតត្បាតពីជំងឺកូវីដ-១៩៕

សូមទស្សនារូបភាពខាងក្រោម៖