យល់ដឹង៖ មនុស្សម្នាក់ៗ មានភ័ព្វព្រេងវាសនាកើតមកខុសៗគ្នា អ្នកខ្លះកើតមកភ្លាមក៏នៅលើ គំនរទ្រព្យសម្បត្តិ ហើយអ្នកខ្លះទៀតកើតមក ជាកូនអ្នកក្រីក្ររកខ្វះមុខខ្វះក្រោយ បាយព្រឹកជាបាយល្ងាច ពេលខ្លះត្រូវទ្រាំដេកអត់ ទាំងពោះកំពុងតែកូរទៀតក៏មាន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតែវាសនាមិនបិទផ្លូវ របស់មនុស្សដែលខំប្រឹងតស៊ូនោះទេ ខ្វះអីអ្នកដែលជោគជ័យ ទ្រព្យសម្បត្តិចាយមិនអស់ មានដើមកំណើតចេញពី គ្រួសារក្រីក្រលំបាកនោះ។ តែក្នុងនោះ អ្នកក៏ត្រូវតែដឹងផងដែរថា តើអ្នកដែលមានពិតប្រាកដ និងអ្នកមានតែតាមបណ្តាញសង្គម គឺមានភាពខុសប្លែកគ្នាបែបណា?
ចង់ដឹងសូមទៅតាមដានទាំងអស់គ្នា៖
១៖ អ្នកមានពិត
អ្នកដែលគេមានពិត គឺគេមិនដែលគិតថា ខ្លួនគេមាននោះទេ។ ពោលគឺគេមិនចេះទៅដើរនិយាយ អួតថាខ្លួនជាអ្នកមាន ចំណាយពេលអត់ប្រយោជន៍ ទៅលើការបង្ហោះរបស់ទ្រព្យ លើបណ្តាញសង្គម បង្អួតភ្នែកអ្នកដទៃ។ គេក៏មិនមានទម្លាប់ ពាក់សំញ៉ែងរបស់ទ្រព្យ ប៉ុនកដៃកជើង ទៅណាមកណាគ្រប់ពេល ខ្លាចគេមិនដឹងថា ខ្លួនជាអ្នកមាននោះទេ។ ព្រោះថាអ្នកមានពិតគឺ មិនមែនសំដៅតែទៅលើ របស់ទ្រព្យតែមួយមុខនោះទេ តែគឺភាពមានបាន ប្រកបដោយបញ្ញា ចេះគិតដឹងខុសត្រូវ អ្វីដែលគួរធ្វើនិងអ្វីដែលមិនគួរធ្វើ។ ឧទាហរណ៍ដូចជា៖ Bill Gates Mark Zuckerberg Jack Ma ជាមហាសេដ្ឋី ដែលមានលុយវាល់លាន លំដាបពិភពលោក តែមើលពីរបៀបរស់នៅគឺ សាមញ្ញខ្លាំងបំផុត ខោអាវពាក់ដដែលៗ គ្មានអង្គរក្សការពារឆ្វេងស្តាំ បរិច្ចាគថវិការជួយដល់ប្រជាជន និងប្រទេសក្រីក្រ ក៏មិនផ្អើលអ្នកកាសែត ទៅចុះផ្សាយដែរ។
២៖ អ្នកមានលើបណ្តាញសង្គម
គ្មានអ្វីដែលចម្លែកនោះទេ អ្នកដែលគេមានពិត គេមិនទៅគិតចង់អួត ចង់ចាញ់ឈ្នះគ្នា នៅលើបណ្តាញសង្គមនោះទេ។ តែគឺមានតែអ្នកអត់នោះទេ ដែលខំព្យាយាមសំញ៉ែងថតបង្ហោះ បង្ហាញអ្នកដទៃថាខ្លួនជាអ្នកមាន។ ដូចពាក្យថា«បុគ្គលណាដែលកាន់តែ អួតថាខ្លួនជាមនុស្សឆ្លាត បុគ្គលនោះក៏កាន់តែល្ងង់ផងដែរ»។ ព្រោះថាសេចក្តីថ្លៃថ្នូរ របស់មនុស្សមិនមែន អាស្រ័យលើគ្រឿងអលង្ការ ខាងក្រៅខ្លួនទាំងអស់នោះ តែមួយមុខទេ។
យ៉ាងណាមិញ ចំណុចរៀបរាប់ខាងលើ គឺគ្រាន់តែជារឿងរ៉ាវ ដែលកើតឡើងហើយ ឆ្លុះបញ្ចាំងពីតថភាព នៃសង្គមរបស់យើង នាពេលបច្ចុប្បន្ននេះតែប៉ុណ្ណោះ។ ម្យ៉ាងការដែលថតបង្ហោះបង្អួត ពីរបស់ទ្រព្យលើបណ្តាញសង្គមនេះ គឺមិនមានជាផលប្រយោជន៍អី្វ ក្រៅពីនាំគ្រោះថ្នាក់ដល់ខ្លួនឯង និងគ្រួសារតែប៉ុណ្ណោះ។ ដូច្នេះការរស់នៅបែបសាមញ្ញ ធម្មតា មិនសូវបង្ហាញ ទើបជាការរស់នៅ ប្រកបទៅដោយក្តីសុខ និងមានសុភមង្គលពិត៕