បរទេស៖ សត្វកណ្តូបដ៏ច្រើនសន្ធឹកសន្ធាប់ បាននឹងកំពុងបំផ្លាញដំណាំប្រជាកសិករនៅពាសពេញទ្វីបអាហ្រ្វិក អាស៊ី និងមជ្ឈឹមបូព៌ា ចាប់តាំងពីខែមករា ដោយក្នុងនោះប្រទេសដែលកំពុងរងគ្រោះខ្លាំងជាងគេគឺ ប្រទេសកេនយ៉ា ឥណ្ឌា អេត្យូពី និងប្រទេសសូម៉ាលី។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមទីភ្នាក់ងារសារព័ត៌មាន The New York Times បានឱ្យដឹងថា មូលហេតុចម្បងដែលបណ្តាលឱ្យមានការលុកលុយរបស់ពពួកកណ្តូបនេះ គឺដោយសារការប្រែប្រួលអាកាសធាតុខ្លាំងក្លាជាបន្តបន្ទាប់ ដោយដំបូងឡើយមានគ្រោះរាំងស្ងួត បន្ទាប់មកក៏មានភ្លៀងច្រើន ហើយនេះគឺជាលក្ខខណ្ឌសម្រាប់ហ្វូងសត្វកណ្តូបលូតលាស់ និងមានចំនួនកាន់តែច្រើនឡើង។
គួរឱ្យដឹងផងដែរថា កណ្តូបវាលខ្សាច់គឺជាសត្វល្អិត ដែលមានគ្រោះថ្នាក់បំផុតក្នុងពិភពលោក ដោយកណ្តូបមួយហ្វូងទំហំមួយគីឡូម៉ែត្រការ៉េ អាចស៊ីចំណីស្មើគ្នាទៅនឹងរបបអាហាររបស់មនុស្ស ៣៥,០០០នាក់ក្នុងមួយថ្ងៃ។ ហើយប្រសិនបើគ្មានការអន្តរាគមន៍ ដើម្បីកម្ចាត់ហ្វូងកណ្តូបចង្រៃឱ្យបានទាន់ពេលវេលាទេនោះ មនុស្សរាប់លាននាក់នៅក្នុងប្រទេសចំនួន ២៣ នឹងត្រូវប្រឈមមុខជាមួយបញ្ហាអត់ឃ្លាន ខណៈពេលបច្ចុប្បន្ននេះ មនុស្សជាង ២០លាននាក់ គឺកំពុងជួបបញ្ហាខ្វះខាតស្បៀងស្រាប់រួចទៅហើយ៕