ឱក​ សុគន្ធកញ្ញា ត្រៀម​ខ្លួន​ក្លាយ​ជា​ទូត​សុឆន្ទៈ​តំណាង​​ឱ្យ​ក្រុម​​ហ៊ុន​​ថ្មី​​មួយ​បន្ថែម​ទៀត​

កំពូលតារាចម្រៀងស្រីប្រចាំប្រទេសកម្ពុជា អ្នកនាង ឱក សុគន្ធកញ្ញា នៅតែអាចរក្សាកេរ្តិ៍ឈ្មោះ និងភាពល្បីល្បាញ​នៅក្នុងពិភពសិល្បៈបានយ៉ាងរឹងមាំ ហើយកាន់តែមានប្រជាប្រិយភាពពីមួយថ្ងៃទៅមួយថ្ងៃ បើទោះបីជាអ្នកនាងមាន​ស្វាមី និងកូនប្រុសមួយរូបក៏ដោយក្តី។

ការងារជាច្រើនក្នុងវិស័យសិល្បៈរបស់ម្ចាស់បទ Saxophone បាត់ស្នេហ៍ រូបនេះបានធ្វើឱ្យអ្នកនាងរកពេល​ទំនេរ​សម្រាប់គ្រួសារស្ទើរមិនបាន ទាំងការផលិតបទចម្រៀងថ្មីៗ ការច្រៀងនៅតាមខនសឺតនានា និងជាពិសេស​គឺធ្វើជា​តារាតំណាងឱ្យផលិតផលរបស់ក្រុមហ៊ុនជាច្រើនមិនតិចជាង ១០ក្រុមហ៊ុននោះទេ។

យ៉ាងណាមិញព័ត៌មានដ៏រសើបមួយដែលលេចចេញពីការបង្ហើបរបស់អ្នកនាងផ្ទាល់បានឱ្យដឹងថា កំពូលតារា​ចម្រៀង​រូបនេះកំពុងតែត្រៀមខ្លួនក្លាយជាទូតសុឆន្ទៈតំណាងឱ្យក្រុមហ៊ុនថ្មីមួយបន្ថែមទៀតផងដែរគឺ Chip Mong Land ដែលជាក្រុមហ៊ុនលក់ផ្ទះគ្រប់ប្រភេទ ស្ថិតក្រោមដំបូលក្រុមហ៊ុនខ្មែរប៊ែវើរីជីស៕