កូរ៉េខាងជើងដំឡើងប្រព័ន្ធបំពងសំឡេង នៅតាមព្រំដែនជាមួយកូរ៉េខាងត្បូងឡើងវិញ

សេអ៊ូល៖ មន្រ្តីយោធាម្នាក់បានបញ្ជាក់កាលពីថ្ងៃចន្ទថា ប្រទេសកូរ៉េខាងជើងកំពុងដំឡើង​​ឧបករណ៍បំពងសំឡេងឃោសនា នៅតាមបណ្តោយព្រំដែនជាមួយខាងត្បូងឡើងវិញ ខណៈពេលដែលភាពតានតឹងរវាងទីក្រុងព្យុងយ៉ាង និងទីក្រុងសេអ៊ូល ​បានបន្តកើតមានឡើងជាថ្មី។

យោងតាមនាយសេនាធិការចំរុះរបស់កូរ៉េខាងត្បូងបាន​ឱ្យដឹងថា ឧបករណ៍បំពង​សំឡេងទាំងអស់នេះ ត្រូវបានកូរ៉េខាងជើងប្រើប្រាស់សំរាប់ធ្វើការឃោសនា ក៏ដូចជាការរិះគន់ឥតសំចៃមាត់ទៅលើរដ្ឋាភិបាលទីក្រុងសេអ៊ូល។ ប៉ុន្តែក្រោយពីមានកិច្ចព្រមព្រៀងរវាងភាគីទាំងសងខាងកាលពីឆ្នាំ ២០១៨ ឧបករណ៍បំពងសម្លេង​​នៅតាមព្រំដែនជាច្រើនកន្លែង ត្រូវបាន​រុះរើ​ចេញ។

គួរបញ្ជាក់ផងដែរថា ភាពតានតឹងរវាងប្រទេសកូរ៉េទាំងពីរបានកើតឡើងជាថ្មី បន្ទាប់មានក្រុម​សកម្មជនមួយចំនួន ដែលរត់ចេញពីកូរ៉េខាងជើង បាន​​ចែកចាយ​ខិត​ប័ណ្ណ​ ដែលមានខ្លឹមសារប្រឆាំង​​ទីក្រុងព្យុងយ៉ាង​ ចូលក្នុង​​ទឹកដីកូរ៉េខាងជើង។ ​ស្រាប់តែមកដល់ថ្ងៃអង្គារសប្តាហ៍មុននេះ កូរ៉េខាងជើងបានធ្វើការសងសឹក​ ដោយបំផ្ទុះការិយាល័យទំនាក់ទំនងអន្តរកូរ៉េ ដែល​បង្កើតឡើងកាលឆ្នាំ ២០១៨ ហើយ​ព្រមទាំងបានគំរាម ថានឹងបញ្ជូនកងទ័ពចល័តនៅតាមតំបន់ព្រំដែនវិញផងដែរ៕